شمالی وزیرستان: تعلیم کے میدان میں احتیاط اور طلبہ کی حفاظت کو اولین ترجیح دیتے ہوئے بنوں تعلیمی بورڈ نے شمالی وزیرستان میں میٹرک کے بقیہ دو پرچے سکیورٹی خدشات کے پیش نظر مؤخر کر دیے ہیں۔ یہ فیصلہ علاقے میں طلبہ، اساتذہ اور امتحانی عملے کی جان و مال کے تحفظ کو مدنظر رکھتے ہوئے کیا گیا۔
بورڈ کے چیئرمین کے مطابق جماعت نہم اور دہم کے تمام پرچے بخیر و خوبی منعقد ہو چکے ہیں، صرف دو پرچے باقی تھے، جن کی نئی تاریخ کا اعلان حالات بہتر ہونے کے بعد جلد کر دیا جائے گا۔
تعلیمی حلقوں اور والدین نے اس فیصلے کو ذمہ دارانہ اقدام قرار دیتے ہوئے سراہا ہے۔ ان کا کہنا ہے کہ تعلیم اہم ہے لیکن جان کی حفاظت سب سے مقدم ہے، اور ایسے فیصلے طلبہ کے مستقبل کی حفاظت اور اعتماد کی بحالی کے لیے ضروری ہیں۔
ضلعی انتظامیہ اور تعلیمی بورڈ کی جانب سے طلبہ کو یقین دہانی کرائی گئی ہے کہ پرچے جلد از جلد دوبارہ منعقد کرائے جائیں گے اور کسی بھی طالبعلم کا تعلیمی نقصان نہیں ہونے دیا جائے گا۔
