علیمہ خان کے بیان پر سیاسی گرما گرمی، عظمیٰ بخاری اور علی امین گنڈاپور کے بیانات منظرعام پر
لاہور / پشاور: علیمہ خان کے حالیہ بیان کے بعد سیاسی حلقوں میں نئی گرما گرمی پیدا ہو گئی ہے۔ پنجاب کی وزیر اطلاعات عظمیٰ بخاری نے ردِعمل میں بانی پاکستان تحریک انصاف (پی ٹی آئی) پر طنز کرتے ہوئے کہا ہے کہ:
"جو نواز شریف کو مائنس کرنے آیا تھا، وہ خود گھر اور پارٹی سے مائنس ہو چکا ہے۔”
عظمیٰ بخاری نے مزید دعویٰ کیا کہ بانی پی ٹی آئی کو خود ان کی بہن اور پارٹی نے ہی مائنس کر دیا ہے۔ ان کے مطابق علیمہ خان کی جانب سے پارٹی کے اہم رہنما علی امین گنڈاپور کے خلاف مبینہ سازشیں کی جا رہی ہیں، اور اسی پر گنڈاپور نے بھی کھل کر ردِعمل دیا ہے۔
وزیراعلیٰ خیبر پختونخوا علی امین گنڈاپور نے علیمہ خان کے رویے پر تبصرہ کرتے ہوئے کہا:
"بانی پی ٹی آئی کو کوئی مائنس نہیں کر سکتا۔ ہم ان کے رشتے داروں کی عزت کرتے ہیں، لیکن پابند صرف بانی پی ٹی آئی کے احکامات کے ہیں۔”
انہوں نے اس بات کا برملا اظہار کیا کہ ان کے خلاف پارٹی کے اندر ہی کچھ عناصر متحرک ہیں۔
سیاسی مبصرین کا کہنا ہے کہ بظاہر یہ بیانات پی ٹی آئی کی اندرونی کشمکش کی عکاسی کر رہے ہیں، اور آنے والے دنوں میں اس کشیدگی میں مزید اضافہ ہو سکتا ہے۔
