لندن: برطانیہ کے وزیر اعظم سر کیئر اسٹارمر نے قومی سلامتی سے متعلق تشویشناک صورتحال کا انکشاف کرتے ہوئے کہا ہے کہ ملک کو دہشتگرد حملے سمیت کئی سنگین خطرات کا سامنا ہے، جن سے نمٹنے کے لیے حکومت مزید مؤثر اقدامات اٹھا رہی ہے۔
وزیر اعظم نے ایک بیان میں کہا کہ برطانیہ کو اس وقت 9 بڑے سیکیورٹی خطرات درپیش ہیں، جن میں سائبر حملے، دہشتگردی کی کارروائیاں، اور موسمیاتی تبدیلیوں سے پیدا ہونے والے چیلنجز شامل ہیں۔ انہوں نے کہا کہ عالمی حالات اور ٹیکنالوجی کی تیز رفتار ترقی کے ساتھ ساتھ ان خطرات میں مسلسل اضافہ ہو رہا ہے۔
کیئر اسٹارمر نے واضح کیا کہ حکومت ان خطرات سے نمٹنے کے لیے سیکیورٹی اداروں کے ساتھ مکمل رابطے میں ہے اور قومی سلامتی کو ہر حال میں یقینی بنانے کے لیے نئے اقدامات اور پالیسیاں متعارف کرائی جا رہی ہیں۔
انہوں نے عوام سے بھی اپیل کی کہ وہ ہوشیار رہیں اور کسی بھی مشکوک سرگرمی کی اطلاع فوری طور پر متعلقہ حکام کو دیں۔
وزیر اعظم کے اس بیان کو برطانیہ کی موجودہ اور آئندہ سلامتی پالیسیوں کی سمت کے تعین کے حوالے سے ایک اہم پیش رفت قرار دیا جا رہا ہے۔
