واشنگٹن / اوسلو: مشرق وسطیٰ میں کشیدگی کے خاتمے کے لیے اہم پیش رفت کے طور پر سابق امریکی صدر ڈونلڈ جے ٹرمپ کو نوبیل امن انعام کے لیے باقاعدہ طور پر نامزد کر دیا گیا ہے۔ یہ نامزدگی 24 جون کو امریکی کانگریس کے رکن اور ریپبلکن پارٹی سے تعلق رکھنے والے بڈی کارٹر کی جانب سے نارویجن نوبیل کمیٹی کو ارسال کی گئی۔
نامزدگی میں ٹرمپ کے کردار کو ایران اور اسرائیل کے درمیان حالیہ 12 روزہ جنگ بندی کے معاہدے میں "غیر معمولی اور تاریخی” قرار دیا گیا۔ بڈی کارٹر نے اپنے خط میں کہا کہ صدر ٹرمپ کی قائدانہ صلاحیت اور سفارتی کوششوں نے اس جنگ بندی کو ممکن بنایا، جسے عالمی برادری ایک ناقابلِ تصور قدم سمجھ رہی تھی۔
خط میں مزید کہا گیا ہے کہ ٹرمپ نے نہ صرف فریقین کے درمیان جنگ بندی کے قیام میں کلیدی کردار ادا کیا بلکہ ایران کی جوہری سرگرمیوں کو روکنے کے لیے بھی جرات مندانہ اور فیصلہ کن اقدامات کیے۔ کارٹر کے مطابق، ٹرمپ نے عالمی امن کو فروغ دینے، جنگ کی روک تھام اور بین الاقوامی ہم آہنگی کی اقدار کو مضبوط کرنے میں نمایاں کردار ادا کیا۔
"صدر ٹرمپ نے مشرق وسطیٰ جیسے نازک خطے میں قیادت کا مظاہرہ کرتے ہوئے دنیا کو امن کی ایک نایاب جھلک دکھائی،” کارٹر نے اپنے خط میں لکھا۔
