رانا ثنا اللہ کا پی ٹی آئی کو وارننگ: تحریک کی کال سے قانون اپنا کردار ادا کرے گا

اسلام آباد — وزیر اعظم کے معاون خصوصی برائے سیاسی امور رانا ثنا اللہ نے کہا ہے کہ اگر پاکستان تحریک انصاف (پی ٹی آئی) تحریک چلانے کی کال دیتی ہے تو اس دوران کچھ افراد قانون کو ہاتھ میں لینے کی کوشش کریں گے اور انہیں گرفتار کیا جائے گا۔

اپنے ایک بیان میں رانا ثنا اللہ نے پی ٹی آئی کی گزشتہ تحریکوں پر تنقید کرتے ہوئے کہا کہ پچھلے سال جب پی ٹی آئی نے 24 نومبر کی تاریخ دی تھی تو انہوں نے کہا تھا کہ نہ ان کے پاس صلاحیت ہے اور نہ تیاری۔ اب 10 مئی بھی گزر چکا ہے، لیکن حالات میں کوئی تبدیلی نہیں آئی اور اگلے دو سال بھی اسی طرح گزر سکتے ہیں۔ انہوں نے کہا کہ پی ٹی آئی غیر ضروری طور پر اپنے اور کارکنوں کے لیے مشکلات پیدا کر رہی ہے۔

رانا ثنا اللہ نے واضح کیا کہ اگر پی ٹی آئی تحریک کی کال دیتی ہے تو اس کے کچھ کارکن قانون شکنی کریں گے اور انہیں گرفتار کیا جائے گا۔

انہوں نے مزید کہا کہ وزیر اعظم نے پی ٹی آئی کو بارہا دعوت دی ہے کہ وہ مسائل پر بات چیت کے لیے آئیں اور مل کر حل تلاش کریں، لیکن تحریک کا خطرہ خود پی ٹی آئی کے لیے نقصان دہ ہوگا۔