واشنگٹن — امریکی الیکٹرک گاڑیاں بنانے والی کمپنی ٹیسلا کے چیف ایگزیکٹو اور سوشل میڈیا سائٹ ایکس کے مالک ایلون مسک نے صدر ٹرمپ کی انتظامیہ میں اپنی مشاورتی خدمات ختم کر دی ہیں۔ وائٹ ہاؤس کے اہلکاروں نے بھی اس بات کی تصدیق کر دی ہے کہ مسک نے ٹرمپ انتظامیہ سے علیحدگی اختیار کر لی ہے۔
ایلون مسک نے خصوصی حکومتی ملازم کی حیثیت سے 130 دن کی مدت پوری کرنے کا وعدہ کیا تھا جو 30 مئی کو مکمل ہو رہی تھی، لیکن مسک نے اس مدت سے دو دن قبل ہی اپنے عہدے سے استعفیٰ دے دیا۔ مسک کی جانب سے یہ اقدام ٹرمپ انتظامیہ میں موجود بے چینی اور مایوسی کی علامت قرار دیا جا رہا ہے، اور اس کو انتظامیہ کی پہلی بڑی وکٹ کے طور پر دیکھا جا رہا ہے۔
مسک نے ایکس پر اپنے بیان میں کہا، "حکومت کے خصوصی ملازم کی حیثیت سے میرا وقت مکمل ہو چکا ہے۔ میں صدر ٹرمپ کا شکریہ ادا کرتا ہوں کہ انہوں نے مجھے موقع دیا کہ بے کار اخراجات کو کم کروں۔ حکومتی استعداد کار بڑھانے کا مشن وقت کے ساتھ مزید مضبوط ہوگا۔” تاہم انہوں نے صدر ٹرمپ کی جانب سے منظور شدہ ایک بڑے بل پر عدم اطمینان بھی ظاہر کیا تھا اور کہا تھا کہ یہ بل وفاقی خسارے میں اضافہ کرے گا اور ان کے محکمے DOGE کی کوششوں کو نقصان پہنچائے گا۔
میڈیا رپورٹس کے مطابق صدر ٹرمپ کی حکومت نے وفاقی ملازمین میں سے 2 لاکھ 60 ہزار یعنی 12 فیصد کو کم کیا ہے۔ مسک نے اپنے سرکاری عہدے پر کام کرتے ہوئے وفاقی بیوروکریسی کی حالت کو اپنی توقع سے بھی خراب قرار دیا تھا۔
ایلون مسک نے اپنی سیاسی سرگرمیوں کی وجہ سے بعض سرمایہ کاروں کی جانب سے تنقید کا سامنا کیا تھا، جنہوں نے مطالبہ کیا تھا کہ وہ ٹیسلا کے امور پر توجہ دیں۔ تاہم مسک نے اپنے اقدامات کا دفاع کیا اور کہا کہ انہیں اپنے سیاسی اخراجات کو کم کرنا ہوگا۔
دلچسپ بات یہ ہے کہ مسک صدر ٹرمپ کے خاص قریبی ساتھیوں میں شامل تھے اور انہوں نے متعدد مواقع پر صدر کے اوول آفس کا دورہ کیا۔ ایک بار مسک کے کمسن بیٹے نے اوول آفس کی تاریخی میز پر مزاحیہ انداز میں انگلی گھما دی، جس کے بعد صدر ٹرمپ نے فوری طور پر اس میز کو تبدیل کروایا تھا۔
یہ میز شاہ بلوط کی لکڑی سے بنی ہے اور برطانیہ کے بحری جہاز HMS Resolute سے حاصل کی گئی تھی۔ اسے ملکہ وکٹوریہ نے 1880 میں صدر ردرفورڈ کو خیر سگالی کے طور پر تحفے میں دیا تھا۔ اس میز کو امریکی صدور نے صدیوں سے استعمال کیا ہے اور یہ اوول آفس کی سب سے اہم تاریخی اشیاء میں شمار ہوتی ہے۔
ایلون مسک کی یہ علیحدگی امریکہ کی سیاسی دنیا میں ایک اہم موڑ سمجھی جا رہی ہے، اور یہ سوالات کو جنم دے رہی ہے کہ ٹرمپ انتظامیہ میں مزید کون کون سے بڑے تبدیلیاں آنے والی ہیں۔
