اسلام آباد: پاکستان تحریک انصاف (پی ٹی آئی) کے سیکریٹری اطلاعات شیخ وقاص اکرم نے کہا ہے کہ پارٹی ملکی سیاسی استحکام کے لیے تمام جماعتوں کو ایک پلیٹ فارم پر لانے کی کوشش کر رہی ہے۔ ان کا کہنا تھا کہ بانی پی ٹی آئی کے خلاف پولی گراف ٹیسٹ کی بات کرنا ایک غیر سنجیدہ اور توہین آمیز عمل ہے، جسے کسی طور پر قبول نہیں کیا جا سکتا۔
شیخ وقاص نے کہا کہ قومی اسمبلی اور سینیٹ میں قائدِ حزبِ اختلاف عمر ایوب اور شبلی فراز کی جانب سے چیف الیکشن کمشنر کی تقرری سے متعلق خطوط لکھے گئے، تاہم تاحال کوئی پیش رفت نہیں ہو سکی۔ ان کا کہنا تھا کہ شفاف انتخابات کے لیے الیکشن کمیشن کی فوری اصلاحات ناگزیر ہیں۔
دوسری جانب پی ٹی آئی رہنما اسد قیصر نے واضح کیا ہے کہ اسپیکر قومی اسمبلی کے خلاف فی الحال کوئی تحریکِ عدم اعتماد لانے کا فیصلہ نہیں ہوا، تاہم اگر لائی گئی تو مکمل حکمتِ عملی کے تحت ہو گی۔
انہوں نے زور دیا کہ پارٹی کسی بیک ڈور ملاقات یا خفیہ مذاکرات میں شامل نہیں، بلکہ ملک کی خاطر کھلے عام تمام سیاسی قوتوں کو یکجا کرنے کی کوشش کی جا رہی ہے تاکہ جمہوری عمل کو آگے بڑھایا جا سکے۔
پی ٹی آئی قیادت کے ان بیانات کو مبصرین نے سیاسی بلوغت اور جمہوریت کے تسلسل کے لیے اہم قرار دیا ہے۔
