اپوزیشن اتحاد کا حکومت کے خلاف جمعہ سے احتجاجی تحریک کا اعلان

اسلام آباد (نمائندہ خصوصی): اپوزیشن اتحاد کے سربراہ محمود خان اچکزئی نے حکومت کے خلاف جمعہ سے احتجاجی تحریک شروع کرنے کا اعلان کردیا ہے۔

اسلام آباد میں میڈیا سے گفتگو کرتے ہوئے محمود اچکزئی کے ہمراہ اپوزیشن رہنماؤں نے کہا کہ وہ 27 ویں آئینی ترمیم سمیت دیگر حکومتی اقدامات کے خلاف ملک گیر احتجاج کریں گے۔

محمود اچکزئی کا کہنا تھا کہ “ہم مذاکرات کے لیے تیار ہیں لیکن مذاکرات اسی بنیاد پر ہوں گے کہ ہمارا مینڈیٹ ہمیں واپس کیا جائے۔”

واضح رہے کہ قومی اسمبلی نے گزشتہ روز 27 ویں آئینی ترمیم کا بل دو تہائی اکثریت سے منظور کرلیا تھا، جب کہ آئینی ترمیم کا نیا متن آج سینیٹ میں منظوری کے لیے پیش کیا جائے گا۔

سیاسی مبصرین کے مطابق اپوزیشن کا احتجاجی اعلان حکومت کے لیے نئے سیاسی چیلنجز پیدا کرسکتا ہے، خصوصاً ایسے وقت میں جب حکومت اپنی آئینی ترامیم کے دفاع میں مصروف ہے۔