واشنگٹن — امریکی صدر ڈونلڈ ٹرمپ نے ایک بار پھر پاکستان کے حوالے سے مثبت رائے کا اظہار کرتے ہوئے کہا ہے کہ "پاکستانی عوام بہترین اور ان کے رہنما عظیم ہیں”، جبکہ بھارت کے بارے میں انہوں نے کہا کہ "بھارت میں میرا دوست نریندر مودی ہے”۔
یہ بات انہوں نے وائٹ ہاؤس میں جنوبی افریقی صدر سیرل رامافوسا سے ملاقات کے دوران صحافیوں سے گفتگو کرتے ہوئے کہی۔ اس موقع پر صدر ٹرمپ نے پاکستان اور بھارت کے درمیان حالیہ جنگ بندی معاہدے کو سراہا اور کہا کہ دونوں ممالک کے درمیان کشیدگی کو کم کرنا خطے کے لیے ایک مثبت پیش رفت ہے۔
صدر ٹرمپ نے گفتگو میں بتایا کہ انہوں نے دونوں ممالک کے رہنماؤں سے کہا، "تم لوگ کیا کر رہے ہو؟ یہ مسئلہ بدترین صورت اختیار کرتا جا رہا تھا”۔ ان کے مطابق امریکہ کی کوششوں سے خطے میں امن کے لیے مثبت اقدامات ممکن ہوئے۔
ٹرمپ کا کہنا تھا کہ پاکستان بھارت کے ساتھ بڑے معاہدے کر رہا ہے اور ان کے درمیان جنگ بندی کرائی گئی ہے، جو دونوں ملکوں اور جنوبی ایشیا کے لیے خوش آئند ہے۔
صدر ٹرمپ کی جانب سے پاکستان اور اس کی قیادت کے بارے میں یہ مثبت کلمات نہ صرف باہمی تعلقات کو مضبوط بنانے میں مددگار ثابت ہو سکتے ہیں، بلکہ خطے میں امن اور تعاون کے فروغ کے لیے ایک حوصلہ افزا اشارہ بھی ہیں۔
جنوبی افریقا کے حوالے سے متنازع گفتگو
تاہم، اسی ملاقات کے دوران صدر ٹرمپ نے جنوبی افریقہ کی صورتحال پر ایک متنازع بیان بھی دیا، جس میں انہوں نے جنوبی افریقی صدر پر الزام عائد کیا کہ ملک میں سفید فام اقلیت، خصوصاً کسانوں کے ساتھ امتیازی سلوک ہو رہا ہے۔
انہوں نے چند دستاویزات اور تصاویر دکھا کر دعویٰ کیا کہ سفید فام کسان جنوبی افریقا سے فرار ہو رہے ہیں۔ اس بیان پر عالمی حلقوں میں تنقید کی جا رہی ہے، کیونکہ اس طرح کے حساس معاملات میں محتاط طرزِ بیان کو ترجیح دی جاتی ہے۔
