شاہ محمود قریشی کی ملک میں سیاسی جنگ بندی کی اپیل، سنجیدہ قومی مکالمے پر زور

لاہور: پاکستان تحریک انصاف (پی ٹی آئی) کے وائس چیئرمین شاہ محمود قریشی نے بھارت کے ساتھ جنگ بندی کے بعد ملک کے اندر بھی سیاسی محاذ آرائی ختم کرنے اور قومی مفاہمت کو فروغ دینے کی اپیل کی ہے۔ انہوں نے کہا ہے کہ موجودہ حالات میں سیاسی جماعتوں کے درمیان "سیاسی جنگ بندی” وقت کی اہم ضرورت ہے۔

کوٹ لکھپت جیل سے عوام کے نام اپنے ایک خط میں شاہ محمود قریشی نے کہا کہ "میں سنجیدہ قومی مکالمہ شروع کرنے کی درخواست کرتا ہوں تاکہ ملک کو داخلی استحکام کی طرف لے جایا جا سکے۔” انہوں نے کہا کہ جیسے قوم پاک بھارت کشیدگی کے دوران متحد ہوئی، ویسے ہی ہمیں اندرونی سیاسی مسائل پر بھی یکجہتی کا مظاہرہ کرنا ہوگا۔

ان کا کہنا تھا کہ پی ٹی آئی کی قیادت، کارکنان اور پوری قوم نے حالیہ کشیدہ صورتحال میں افواجِ پاکستان کے ساتھ مکمل یکجہتی دکھائی، اور یہ وقت ہے کہ ہم سیاسی محاذ پر بھی بالغ نظری اور اتحاد کا ثبوت دیں۔

واضح رہے کہ کچھ روز قبل پی ٹی آئی کے چیئرمین بیرسٹر گوہر نے بھی اسی نوعیت کی تجویز دیتے ہوئے کہا تھا کہ "اگر بھارت کے ساتھ سیز فائر ممکن ہے، تو ملک میں سیاسی سیز فائر کیوں نہیں ہو سکتا؟” انہوں نے اس بات پر بھی زور دیا کہ ملک کی سب سے بڑی سیاسی جماعت کے بانی اور رہنما جیل میں ہیں، اور سیاسی مسائل کا حل مکالمے سے ہی ممکن ہے۔

سیاسی تجزیہ کاروں کے مطابق، شاہ محمود قریشی اور بیرسٹر گوہر کے بیانات قومی سطح پر ایک نئے سیاسی بیانیے کی بنیاد رکھ سکتے ہیں، جس میں مفاہمت، برداشت اور مکالمے کو ترجیح حاصل ہو۔