اسلام آباد — ملک بھر کے تمام ایئرپورٹس پر فلائٹ آپریشن بحال کر دیا گیا ہے، جس سے ہوابازی کے نظام میں استحکام کی امید پیدا ہو گئی ہے۔ اگرچہ بعض انتظامی چیلنجز کے باعث فلائٹ شیڈول متاثر ہو رہا ہے، لیکن حکام کی جانب سے نظام کو مکمل طور پر بحال کرنے کی کوششیں تیزی سے جاری ہیں۔
فلائٹ شیڈول کے مطابق آج کراچی، لاہور، اسلام آباد، سیالکوٹ، ملتان، فیصل آباد، پشاور اور کوئٹہ سمیت مختلف ایئرپورٹس پر کل 149 پروازیں منسوخ ہوئیں۔ اسلام آباد سے 42، لاہور سے 36 اور کراچی سے 34 پروازیں متاثر ہوئیں، جب کہ باقی شہروں سے بھی چند پروازیں منسوخ کی گئیں۔
تاہم، مثبت پیشرفت یہ ہے کہ ایئرپورٹس کی بندش کے بعد سے کراچی ایئرپورٹ سے اب تک 6 پروازیں کامیابی سے آپریٹ کی جا چکی ہیں، اور دیگر شہروں میں بھی بتدریج بحالی کی کوششیں جاری ہیں۔
یاد رہے کہ گزشتہ روز ایئرپورٹس کی بندش کے باعث 400 سے زائد پروازیں متاثر ہوئی تھیں، جن میں سے 130 پروازیں منسوخ اور 24 کو متبادل ایئرپورٹس پر منتقل کیا گیا تھا۔
حکام کا کہنا ہے کہ تمام تر وسائل بروئے کار لا کر فلائٹ آپریشن کو مکمل طور پر بحال کیا جا رہا ہے، اور مسافروں کی سہولت کے لیے ہنگامی اقدامات کیے جا رہے ہیں۔ ہوابازی سے وابستہ ادارے اور عملہ صورتِ حال کو بہتر بنانے کے لیے مسلسل کام کر رہے ہیں۔
