تہران: ایران کے وزیر دفاع عزیز ناصر زادہ نے امریکا اور اسرائیل کو خبردار کرتے ہوئے کہا ہے کہ اگر ان میں سے کسی نے ایران پر حملے کی جرات کی تو جوابی کارروائی فوری اور مؤثر ہوگی، اور دشمن کے مفادات، افواج اور اڈوں کو جہاں اور جب ضروری ہوا، نشانہ بنایا جائے گا۔
یہ بیان اسرائیلی وزیر اعظم بنجمن نیتن یاہو کی جانب سے ایران پر حملے کی دھمکی کے بعد سامنے آیا ہے، جو یمن سے اسرائیل کے بن گوریان ایئرپورٹ پر بیلسٹک میزائل حملے کے ردعمل میں دیا گیا تھا۔
نیتن یاہو نے الزام عائد کیا کہ یہ حملہ ایران کے حمایت یافتہ حوثی گروپ کی جانب سے کیا گیا، اور اسرائیل "اپنی مرضی کے وقت اور جگہ پر” ایران کو جواب دے گا۔ یاد رہے کہ راکٹ حملے کے باعث بن گوریان ایئرپورٹ پر کئی پروازیں معطل کر دی گئیں، جس سے اسرائیلی فضائی سرگرمیاں متاثر ہوئیں۔
ایرانی وزیر دفاع نے اسرائیلی دھمکیوں کو مسترد کرتے ہوئے کہا کہ ایران دفاعی طور پر مکمل تیار ہے اور کسی بھی قسم کی جارحیت کا فوری، سخت اور مؤثر جواب دیا جائے گا۔ "ہم خطے میں طاقت کا توازن بگاڑنے کی کسی بھی کوشش کو کامیاب نہیں ہونے دیں گے،” انہوں نے دوٹوک الفاظ میں کہا۔
خطے میں بڑھتی ہوئی کشیدگی پر عالمی برادری کی نظر ہے، اور ماہرین خبردار کر رہے ہیں کہ کسی بھی قسم کی عسکری مہم جوئی مشرقِ وسطیٰ میں امن و استحکام کے لیے خطرناک ثابت ہو سکتی ہے۔
