لاہور: وزیراعلیٰ پنجاب مریم نواز کو ایک اور بڑا بین الاقوامی اعزاز حاصل ہوا ہے، جاپانی حکومت نے انہیں پانچ روزہ سرکاری دورے کی خصوصی دعوت دی ہے۔ مریم نواز جاپان کا دورہ کرنے والی پاکستان کی پہلی وزیراعلیٰ بن گئی ہیں، جو نہ صرف سفارتی سطح پر ایک سنگ میل ہے بلکہ بین الاقوامی تعلقات میں پنجاب کے بڑھتے کردار کا بھی مظہر ہے۔
وزیراعلیٰ مریم نواز جمعہ کو اعلیٰ سطحی وفد کے ہمراہ لاہور ایئرپورٹ سے جاپان روانہ ہوئیں۔ انہیں روانگی کے وقت اعلیٰ حکومتی حکام نے پروٹوکول کے ساتھ رخصت کیا۔ وفد میں سینئر وزیر مریم اورنگزیب، وزیراطلاعات و ثقافت عظمیٰ بخاری، صوبائی وزراء ملک صہیب بھرت، ذیشان رفیق، معاون خصوصی ثانیہ عاشق اور دیگر اعلیٰ سرکاری افسران شامل ہیں۔
دورے کی اہم جھلکیاں
وزیراعلیٰ مریم نواز دورے کے دوران جاپان کے تین بڑے شہروں—ٹوکیو، اوساکا اور یاکوہوما—کا دورہ کریں گی۔ وہ اوساکا میں منعقد ہونے والی عالمی نمائش "ورلڈ ایکسپو 2025” میں پاکستان کی نمائندگی کریں گی، جو بین الاقوامی سطح پر پاکستان کا سافٹ امیج اجاگر کرنے کا ایک اہم موقع ہوگا۔
دورے میں مریم نواز جاپان کی اہم حکومتی، کاروباری اور صنعتی شخصیات سے ملاقاتیں کریں گی اور مختلف جاپانی اداروں کا دورہ کریں گی۔ اس دورے کا مقصد پاکستان اور جاپان کے درمیان دوطرفہ تعلقات کو فروغ دینا، خاص طور پر پنجاب میں سرمایہ کاری کے نئے مواقع پیدا کرنا ہے۔
اہمیت اور امکانات
یہ دورہ نہ صرف پنجاب بلکہ پورے پاکستان کے لیے ایک اہم سفارتی کامیابی قرار دیا جا رہا ہے۔ اس سے نہ صرف جاپانی سرمایہ کاروں کا اعتماد بڑھے گا بلکہ عالمی سطح پر پنجاب کی قیادت کا مثبت امیج بھی سامنے آئے گا۔
