وارن، مشی گن— سابق امریکی صدر ڈونلڈ ٹرمپ نے مشی گن کے شہر وارن میں ایک بڑے عوامی جلسے سے خطاب کرتے ہوئے اپنی دوسری مدت صدارت کے ابتدائی 100 دنوں کی کارکردگی کو "تاریخی کامیابیاں” قرار دیا۔ ہزاروں افراد کی شرکت کے ساتھ یہ جلسہ اُن کے 20 جنوری کو حلف برداری کے بعد سب سے بڑا عوامی اجتماع ثابت ہوا۔
ٹرمپ نے اپنی تقریر میں ڈیموکریٹک پارٹی، بالخصوص سابق صدر جو بائیڈن پر سخت تنقید کی۔ انہوں نے کہا کہ بائیڈن انتظامیہ کی ناقص پالیسیوں کی وجہ سے امریکہ کو مہنگائی، معاشی غیر یقینی اور عالمی سطح پر تجارتی دباؤ کا سامنا ہے۔
ٹرمپ نے دعویٰ کیا کہ اُن کے سابقہ دورِ صدارت (2017 تا 2021) میں امریکہ کی معیشت تاریخ کی سب سے مضبوط معیشت تھی۔ ان کا کہنا تھا:
"ہم نے زبردست کارکردگی دکھائی، اور اب ہم اس سے بھی بہتر کر رہے ہیں۔”
انہوں نے فیڈرل ریزرو کے چیئرمین جیروم پاول کو بھی شدید تنقید کا نشانہ بناتے ہوئے کہا کہ وہ اپنے عہدے سے انصاف نہیں کر رہے اور اُن کی پالیسیاں امریکی عوام کو مہنگائی کے بوجھ تلے دبا رہی ہیں۔
ٹرمپ نے وارن میں موجود ہزاروں افراد سے خطاب کے دوران کہا کہ وہ امریکہ کو ایک بار پھر معاشی ترقی کی راہ پر گامزن کرنے کے لیے پُرعزم ہیں۔
"ہم نے پہلے بھی یہ کر کے دکھایا، اور اب بھی کریں گے۔ وقت آ گیا ہے کہ میرے ناقدین ہماری کامیابیوں کو تسلیم کریں۔”
واضح رہے کہ وارن شہر امریکی آٹو انڈسٹری کا مرکز مانا جاتا ہے اور یہاں جنرل موٹرز کا ٹیکنیکل سینٹر بھی واقع ہے، جو اس جلسے کو سیاسی طور پر بھی خاص اہمیت دیتا ہے۔
