ملک کے بیشتر علاقوں میں موسم گرم اور خشک رہے گا: پی ایم ڈی

محکمہ موسمیات (پی ایم ڈی) نے آئندہ 24 گھنٹوں کے دوران ملک کے بیشتر علاقوں میں موسم زیادہ تر گرم اور خشک رہنے کی پیش گوئی کی ہے جبکہ جنوبی علاقوں میں شدید گرمی کی پیش گوئی کی ہے۔

محکمہ موسمیات کے مطابق بالائی خیبرپختونخوا، گلگت بلتستان اور کشمیر میں بعض مقامات پر مطلع جزوی طور پر ابر آلود اور گرج چمک کے ساتھ بارش کا امکان ہے۔ اسلام آباد، دن بھر گرم اور خشک حالات رہیں گے،

شام یا رات تک مطلع جزوی طور پر ابر آلود رہے گا۔ خیبرپختونخوا کے بیشتر اضلاع میں موسم گرم اور خشک رہے گا۔ تاہم شام یا رات کے وقت دیر، سوات، کوہستان، کرم، کوہاٹ، کرک، ہنگو، لکی مروت، خیبر اور وزیرستان سمیت بالائی علاقوں میں گرج چمک کے ساتھ ہلکی بارش کا امکان ہے۔

پنجاب میں، صوبہ مجموعی طور پر گرم اور خشک رہے گا، پوٹھوہار کے علاقے میں شام یا رات کے وقت جزوی طور پر ابر آلود رہنے کا امکان ہے۔

جنوبی پنجاب میں دن کے وقت درجہ حرارت معمول سے 3 سے 5 ڈگری سینٹی گریڈ زیادہ رہنے کا امکان ہے۔ سندھ کے بیشتر اضلاع میں موسم انتہائی گرم اور خشک رہے گا، دن کے وقت درجہ حرارت اوسط سے 4 سے 6 ڈگری سینٹی گریڈ زیادہ رہنے کا امکان ہے۔

بلوچستان کے بیشتر اضلاع میں تیز ہواؤں کے ساتھ موسم گرم اور خشک رہنے کا امکان ہے۔گلگت بلتستان اور کشمیر میں مطلع جزوی طور پر ابر آلود رہنے کے ساتھ ہلکی بارش اور گرج چمک کے ساتھ بارش کی پیشگوئی کی گئی ہے۔گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا جبکہ جنوبی علاقوں میں درجہ حرارت انتہائی بلند رہا۔

بالائی خیبرپختونخوا اور گلگت بلتستان میں چند مقامات پر گرج چمک کے ساتھ ہلکی بارش ہوئی۔ جمعرات کو سبی ملک کا گرم ترین شہر رہا جہاں درجہ حرارت 46 ڈگری سینٹی گریڈ تک بڑھ گیا۔