بانی پی ٹی آئی اور بشریٰ بی بی سے 6 لوگوں کی ملاقات، سکیورٹی مزید سخت کردی گئی
بانی پی ٹی آئی اور بشریٰ بی بی سے ملاقات کے لیے چھ ناموں کی فہرست اڈیالہ جیل بھجوائی گئی
راولپنڈی: راولپنڈی کی اڈیالہ جیل میں بانی پاکستان تحریکِ انصاف (پی ٹی آئی) اور بشریٰ بی بی سے ملاقات کے لیے پی ٹی آئی کی جانب سے چھ ناموں کی فہرست جیل حکام کو بھیج دی گئی ہے۔
ذرائع کے مطابق ملاقات کی فہرست میں چھ افراد کے نام شامل ہیں، جن میں بانی پی ٹی آئی کی بہنیں اور بشریٰ بی بی کے اہل خانہ بھی شامل ہو سکتے ہیں۔ پارٹی کی قیادت نے اڈیالہ جیل پہنچنے کی کال بھی دی ہے، جس کے پیش نظر جیل کے اطراف سخت سکیورٹی انتظامات کیے گئے ہیں۔
پولیس ذرائع نے بتایا کہ پانچ مقامات پر پولیس پکٹس قائم کی جائیں گی، جن میں داہگل، فیکٹری ناکہ، کورگھ پور، اور گیٹ نمبر 1 اور 5 شامل ہیں۔ راولپنڈی شہر بھر میں دفعہ 144 نافذ ہے تاکہ کسی بھی قسم کے ہنگامے یا احتجاج کو روکا جا سکے۔
یہ ملاقات بانی پی ٹی آئی اور بشریٰ بی بی کے اہل خانہ اور پارٹی کے قریبی رشتہ داروں کے لیے اہم سمجھی جا رہی ہے، جبکہ سکیورٹی کے سخت انتظامات یقینی بنانے کے لیے پولیس متحرک ہے۔
