لندن:
برطانیہ میں ہنر مند کارکنوں اور صحت و نگہداشت کے شعبے سے وابستہ افراد کے لیے 2025 کے دوران ویزا درخواستوں میں نمایاں کمی ریکارڈ کی گئی ہے، جس کی بنیادی وجہ حکومت کی جانب سے عائد کی گئی سخت امیگریشن پابندیاں قرار دی جا رہی ہیں۔
اعداد و شمار کے مطابق 2024 کے مقابلے میں صحت اور نگہداشت کے کارکنوں کے ویزوں میں 62 ہزار، ہنر مند کارکنوں کے ویزوں میں 47 ہزار 200 جبکہ فیملی ویزوں میں 10 ہزار 700 کی کمی ہوئی ہے۔
رپورٹس کے مطابق نئے قوانین کے تحت خاندانوں اور انفرادی درخواست گزاروں کے لیے زیادہ تنخواہ کی شرط عائد کی گئی ہے، جبکہ دیکھ بھال کرنے والے کارکنوں اور طلبہ کے لیے بھی سخت ضوابط متعارف کرائے گئے ہیں۔ اس کے علاوہ مستقل رہائش (سیٹلمنٹ) اور خاندان کی بحالی کے لیے بھی کڑے معیار مقرر کیے گئے ہیں۔
ماہرین کا کہنا ہے کہ ان پالیسیوں کے نتیجے میں رواں سال برطانیہ میں خالص ہجرت 2 لاکھ سے کم رہنے کا امکان ہے، جو 2005 کے بعد کم ترین سطح ہوگی۔ واضح رہے کہ 2023 میں خالص ہجرت کرنے والوں کی تعداد 9 لاکھ 44 ہزار تک پہنچ گئی تھی۔
