کینیڈا نے سیاحت کے فروغ اور بین الاقوامی تعلقات کو مضبوط بنانے کے لیے 13 ممالک کے شہریوں کو ویزا فری انٹری کی سہولت دینے کا فیصلہ کیا ہے۔ اس اقدام کے تحت، یہ ممالک اب مخصوص شرائط پوری کرنے کی صورت میں بغیر ویزا کینیڈا کا سفر کر سکیں گے۔
کینیڈا نے الیکٹرانک ٹریول آتھرائزیشن (eTA) پروگرام کی سہولت بھی مزید ممالک تک بڑھا دی ہے، جس کا مقصد قلیل مدتی دوروں کے لیے داخلے کے عمل کو آسان بنانا ہے۔
نئے ویزا فری ممالک کی فہرست میں شامل ممالک ہیں:
اینٹیگوا اینڈ باربوڈا
ارجنٹینا
کوسٹا ریکا
مراکش
پاناما
فلپائن
سینٹ کٹس اینڈ نیوس
سینٹ لوسیا
سینٹ ونسنٹ اینڈ دی گریناڈینز
سیشلز
تھائی لینڈ
ٹرینیڈاڈ اینڈ ٹوباگو
یوراگوئے
اس اقدام کو بالخصوص کیریبین ممالک کے ساتھ سفارتی تعلقات کے حوالے سے ایک مثبت پیش رفت قرار دیا جا رہا ہے، کیونکہ ان میں سے پانچ ممالک اس نئی فہرست میں شامل ہیں۔
حکام کے مطابق، ویزا فری داخلے کی یہ سہولت ان مسافروں کے لیے ہوگی جو ہوائی سفر کے ذریعے کینیڈا آئیں اور جنہوں نے گزشتہ 10 برسوں میں کبھی کینیڈین ویزا حاصل کیا ہو یا اس وقت ان کے پاس امریکا کا درست نان امیگرنٹ ویزا موجود ہو۔ اہل افراد بغیر علیحدہ ویزا حاصل کیے کینیڈا میں زیادہ سے زیادہ چھ ماہ تک قیام کر سکیں گے۔
اس کے علاوہ، الیکٹرانک ٹریول آتھرائزیشن (eTA) ایک ڈیجیٹل اجازت نامہ ہے جو ویزا فری ممالک کے شہریوں کے لیے لازمی ہوتا ہے۔
کینیڈین حکومت کا کہنا ہے کہ اس پالیسی کا مقصد سیاحت میں اضافہ، بین الاقوامی روابط کو فروغ دینا اور کینیڈا کو عالمی مسافروں کے لیے مزید پرکشش بنانا ہے۔
