دہشت گردی کے خلاف جنگ پوری قوم کی جنگ ہے، ڈی جی آئی ایس پی آر

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) لیفٹیننٹ جنرل احمد شریف چوہدری نے اپنی اہم پریس کانفرنس میں سیکیورٹی صورتحال اور دہشت گردی کے خلاف اقدامات پر تفصیل سے بات کی۔

ڈی جی آئی ایس پی آر نے کہا کہ اس پریس کانفرنس کا مقصد دہشت گردی کے خلاف حالیہ اقدامات کا احاطہ کرنا ہے۔ ان کا کہنا تھا کہ دہشت گردی کے خلاف جنگ پوری قوم کی جنگ ہے اور اس میں ریاست اور عوام کے درمیان ہم آہنگی نظر آتی ہے۔

انہوں نے مزید وضاحت کی کہ اس بریفنگ کا مقصد گزشتہ سال کے دوران انسداد دہشت گردی کے حوالے سے کیے گئے اقدامات کا جامع جائزہ پیش کرنا ہے۔ "یہ پریس کانفرنس کا واحد مقصد ہے اور میں درخواست کروں گا کہ ہم انسداد دہشت گردی پر توجہ مرکوز رکھیں کیونکہ یہ اس وقت پاکستان کے لیے سب سے بڑا خطرہ ہے۔”

لیفٹیننٹ جنرل احمد شریف چوہدری نے اس بات پر زور دیا کہ 2025 دہشت گردی کے خلاف جنگ میں ایک تاریخی اور نتیجہ خیز سال ثابت ہوگا، جس کے دوران دہشت گردی کے خلاف ہماری کوششوں میں بے مثال شدت دیکھی گئی۔ انہوں نے کہا کہ یہ جنگ گزشتہ دو دہائیوں سے جاری ہے اور قوم نے ہر مرحلے پر اپنی بھرپور حمایت اور عزم کا مظاہرہ کیا ہے۔

اس موقع پر ڈی جی آئی ایس پی آر نے مزید کہا کہ دہشت گردی کے خلاف جنگ میں پوری قوم کی محنت اور تعاون کی ضرورت ہے تاکہ ملک کو اس سنگین مسئلے سے نجات دلائی جا سکے۔