وزیر دفاع خواجہ آصف: پی ٹی آئی سے مذاکرات کے حق میں نہیں، بانی پارٹی کے ذاتی ایجنڈے پر مرکوز ہیں
اسلام آباد: وزیر دفاع خواجہ آصف نے کہا ہے کہ وہ پی ٹی آئی سے مذاکرات کے حق میں نہیں ہیں کیونکہ بانی پی ٹی آئی کا اپنے ذاتی مفادات کے سوا کوئی ایجنڈا نہیں ہے۔
ایک انٹرویو میں خواجہ آصف نے کہا کہ پانچ بڑوں کی بیٹھک کے لیے دیانت داری اہم ہے اور پی ٹی آئی میں کچھ لوگ مذاکرات کے حامی ہیں جبکہ کچھ تصادم کی بات کرتے ہیں۔ انہوں نے کہا:
"مفاہمت اور گفتگو کے لیے ایجنڈا کون طے کرے گا؟ میں بانی پی ٹی آئی سے متعلق کوئی گارنٹی دینے کے لیے تیار نہیں۔ میری پارٹی اگر پی ٹی آئی سے مذاکرات کرے گی تو میں اس کے خلاف آواز اٹھاؤں گا۔”
وزیر دفاع نے مزید کہا کہ پی ٹی آئی قیادت نے گزشتہ دو سال میں وفاق پر حملے اور تشدد کی دھمکیاں دیں، اور دہشت گردی کے خلاف شہید ہونے والے جوانوں کے گھروں کا کوئی دورہ نہیں کیا۔ انہوں نے سوال اٹھایا:
"پی ٹی آئی والے شہدا کے خون کے ساتھ نہیں کھڑے تو میں ان کے ساتھ مذاکرات کروں؟”
خواجہ آصف نے 9 مئی کے واقعے کی کھل کر مذمت نہ کرنے اور لوگوں کو اکسانے والے ارکان اسمبلی کی موجودگی پر بھی تنقید کی۔
انہوں نے کہا کہ اگر پارٹی مذاکرات کرے بھی تو وہ اس کے خلاف آواز اٹھانے میں پیچھے نہیں ہٹیں گے، اور پی ٹی آئی سے کوئی پیش رفت متوقع نہیں ہے۔
