اندور: بھارتی شہر اندور کے گنجان آباد علاقے بھاگیرتھ پورہ میں پینے کے صاف پانی میں سیوریج شامل ہونے کے باعث شدید اسہال اور قے کی وبا پھوٹ پڑی، جس کے نتیجے میں ہلاکتوں کی تعداد 10 ہو گئی جبکہ 1400 سے زائد افراد متاثر ہو چکے ہیں اور سینکڑوں مریض مختلف اسپتالوں میں زیرِ علاج ہیں۔
رپورٹس کے مطابق آلودہ پانی کی فراہمی کے باعث علاقے میں اچانک قے، دست، پیٹ درد اور تیز بخار کے کیسز میں اضافہ ہوا۔ متاثرہ افراد کی بڑی تعداد کو تشویشناک حالت میں اسپتال منتقل کیا گیا، جہاں درجنوں مریضوں کو انتہائی نگہداشت کے وارڈ میں داخل کرنا پڑا۔
ابتدائی لیبارٹری ٹیسٹ میں پانی کے نمونوں سے خطرناک فضلاتی بیکٹیریا ای کولی اور کلیبسیئیلا کی موجودگی کی تصدیق ہوئی ہے۔ طبی ماہرین کے مطابق یہ بیکٹیریا عام طور پر انسانی آنتوں میں پائے جاتے ہیں، تاہم پینے کے پانی میں شامل ہو جائیں تو بالخصوص بچوں، بزرگوں اور کمزور قوتِ مدافعت رکھنے والے افراد کے لیے جان لیوا ثابت ہو سکتے ہیں۔
حکام کا کہنا ہے کہ نرمدہ پینے کے پانی کی پائپ لائن کا ایک حصہ بھاگیرتھ پورہ میں پولیس چوکی کے قریب ٹوائلٹ اور سیوریج لائن کے نیچے یا ساتھ سے گزرتا ہے، جہاں پائپ لائن میں رساؤ پیدا ہوا۔ اسی رساؤ کے باعث انسانی فضلے سے آلودہ سیوریج کا پانی صاف پانی کی سپلائی میں شامل ہو گیا، جس سے پورے علاقے کی نلکوں کی فراہمی متاثر ہوئی۔
علاقہ مکینوں کے مطابق کئی روز سے نلکوں سے بدبودار اور گدلا پانی آ رہا تھا، تاہم بار بار شکایات کے باوجود بروقت کارروائی نہ کی گئی۔ بعد ازاں بڑی تعداد میں افراد کی طبیعت بگڑنے لگی اور وہ اسپتالوں کا رخ کرنے پر مجبور ہو گئے۔
صورتحال سنگین ہونے پر ضلعی انتظامیہ نے متاثرہ پائپ لائنوں کو فلش کرنے، مرمت کے کام اور متبادل ذرائع سے صاف پانی کی فراہمی کے اقدامات شروع کر دیے ہیں۔ حکام نے عوام کو ہدایت کی ہے کہ وہ پانی ابال کر استعمال کریں اور کسی بھی بیماری کی صورت میں فوری طور پر قریبی اسپتال سے رجوع کریں۔
