ملک بھر میں طویل خشک سالی کا خاتمہ، بارش اور برفباری کا آغاز
پاکستان میں طویل خشک سالی کے بعد خوش آئند موسم کا آغاز ہو چکا ہے، اور مختلف علاقوں میں بارشیں اور بالائی علاقوں میں برفباری کا سلسلہ جاری ہے۔ محکمہ موسمیات نے مزید بارشوں اور برفباری کی پیشگوئی کی ہے، جس کے مطابق اسلام آباد، کشمیر، گلگت بلتستان اور خیبرپختونخوا کے مختلف علاقوں میں آج بارش اور پہاڑوں پر برفباری کا امکان ہے۔
مری اور گلیات میں تیز ہواؤں کے ساتھ بارش اور برفباری کی توقع ہے، جب کہ مشرقی پنجاب اور بالائی سندھ میں دھند اور اسموگ کی صورتحال برقرار رہنے کا خدشہ ہے۔
محکمہ موسمیات کے مطابق، اٹک، راولپنڈی، جہلم، چکوال، تلہ گنگ، میانوالی، بھکر، سرگودھا، خوشاب، فیصل آباد، حافظ آباد، گوجرانوالہ، لاہور، گجرات، منڈی بہاؤالدین، سیالکوٹ، نارووال، شیخوپورہ، ملتان، جھنگ، ڈی جی خان اور ٹوبہ ٹیک سنگھ میں بارش ہونے کی توقع ہے۔
بلوچستان کے مختلف علاقوں بشمول چاغی، نوشکی، واشک، پنجگور، کیچ، گودار، قلات اور مستونگ میں بھی بارشیں متوقع ہیں، اور محکمہ موسمیات نے کوئٹہ، زیارت، ہرنائی، چمن، موسیٰ خیل اور ژوب میں بھی بارش اور پہاڑوں پر برفباری کا امکان ظاہر کیا ہے۔
یہ موسمی تبدیلیاں کسانوں اور زراعت کے شعبے کے لیے خوش آئند ثابت ہوں گی، جو طویل خشک سالی سے متاثر ہوئے تھے۔ عوام کو احتیاطی تدابیر اختیار کرنے کی ہدایت کی گئی ہے، خاص طور پر ان علاقوں میں جہاں تیز ہوائیں اور برفباری کا امکان ہے۔
