ایک مائنس ہوا تو ایک بھی باقی نہیں رہے گا، حالات آپ کے کنٹرول میں نہیں آئیں گے، چیئرمین پی ٹی آئی
اسلام آباد میں پاکستان تحریک انصاف (پی ٹی آئی) کی چیئرمین بیرسٹر گوہر نے حکومت پر شدید تنقید کرتے ہوئے کہا ہے کہ حالات حکومت کے کنٹرول سے باہر جا سکتے ہیں۔ پارلیمنٹ ہاؤس کے باہر میڈیا سے گفتگو میں انہوں نے کہا، "یہ کاروباری دنیا نہیں کہ دو میں سے ایک مائنس کرو تو ایک رہ جائے گا، اگر ایک مائنس ہوا تو اس کے بعد ایک بھی باقی نہیں رہے گا۔”
انہوں نے کہا کہ خان صاحب کی بہنوں پر واٹر کینن کا استعمال کیا گیا، اور ملاقاتوں کے لیے آنے والے افراد پر بھی اسی طرح کا رویہ اختیار کیا جا رہا ہے۔ بیرسٹر گوہر نے کہا، "اگر وہ دو گھنٹے تک بیٹھے رہتے تو ملک اور قوم کا کیا نقصان ہو جاتا۔”
بیرسٹر گوہر نے حکومت پر الزام لگایا کہ وہ پی ٹی آئی رہنماؤں کے ساتھ ملاقاتوں کو بہانوں کی بنیاد پر روکتی ہے۔ انہوں نے سوال کیا، "کیا بشریٰ بی بی کی فیملی پریس کانفرنسز کر رہی ہیں، ان کی ملاقاتیں کیوں نہیں کروا رہے؟”
انہوں نے مزید کہا کہ پی ٹی آئی ملک میں جمہوریت کے لیے کام کر رہی ہے اور اس وقت تین کروڑ عوام کی نمائندگی کر رہی ہے۔ انہوں نے حکومت پر تنقید کرتے ہوئے کہا کہ فیڈریشن کے یونٹس کو ایک دوسرے کے خلاف کھڑا کیا جا رہا ہے اور پی ٹی آئی پر لگنے والے ممکنہ پابندیوں پر تشویش کا اظہار کیا۔
بیرسٹر گوہر نے خبردار کیا کہ اگر موجودہ حالات اسی طرح برقرار رہے تو حکومت کے کنٹرول میں رہنا مشکل ہو جائے گا۔
