وزیرِ اعظم شہباز شریف: پاکستان جلد قرضوں سے آزاد ہو کر معاشی طور پر خود کفیل ہوگا
اسلام آباد: وزیراعظم محمد شہباز شریف نے کہا ہے کہ ان شاء اللہ وہ وقت دور نہیں جب پاکستان بیرونی قرضوں سے مکمل نجات حاصل کر کے معاشی طور پر خود کفیل بن جائے گا۔
وزیرِ اعظم نے آئی ایم ایف کے جاری پروگرام کے تحت حکومتی معاشی اصلاحات اور اقدامات کے مؤثر نفاذ پر معاشی ٹیم کی کوششوں کی پذیرائی کی۔ انہوں نے کہا کہ فیلڈ مارشل سید عاصم منیر، چیف آف آرمی اسٹاف و چیف آف ڈیفنس اسٹاف، نے اصلاحاتی ایجنڈے کے نفاذ اور پاکستان کی معاشی ترقی کی راہ ہموار کرنے میں کلیدی کردار ادا کیا ہے۔
وزیرِ اعظم نے مزید کہا کہ عالمی مالیاتی فنڈ کی جانب سے پاکستان میں اصلاحات کے مؤثر نفاذ پر اظہار اطمینان، وزیر خزانہ محمد اورنگزیب اور ان کی ٹیم کی محنت کا منہ بولتا ثبوت ہے۔ آئی ایم ایف کی جانب سے حالیہ مالی اجراء بھی اس بات کا ثبوت ہے کہ پاکستان معاشی استحکام اور ترقی کے لیے ضروری اقدامات پر عمل پیرا ہے۔
شہباز شریف نے کہا کہ ڈیفالٹ کے دہانے سے ملک کو استحکام اور ترقی کی سمت میں گامزن کرنا ایک کٹھن مرحلہ تھا، جس کے لیے سب نے قربانی دی۔ سیاسی جماعتوں نے سیاست کی قربانی دی اور قوم نے معاشی مشکلات برداشت کر کے ناممکن کو ممکن کر دکھایا۔
وزیرِ اعظم نے کہا کہ اللہ کے فضل و کرم سے پاکستان کی معاشی اصلاحات اور ڈیجیٹائزیشن دنیا بھر میں کامیاب کیس اسٹڈی کے طور پر مثال بن گئی ہے اور پاکستان کی معاشی ترقی کا خواب جلد شرمندہ تعبیر ہوگا۔
انہوں نے مزید کہا کہ استحکام کے بعد ترقی کی سمت میں معیشت کے حوالے سے ابھی مزید محنت درکار ہے اور وہ بطور خادم پاکستان عوام کی خوشحالی اور ملک کی بیرونی قرضوں سے مکمل نجات تک کام جاری رکھیں گے۔
