پیٹرولیم مصنوعات کی قیمتوں میں کمی کا امکان

اسلام آباد: یکم دسمبر 2025 سے پیٹرولیم مصنوعات کی قیمتوں میں کمی کا امکان ظاہر کیا جا رہا ہے، جس سے عوام کو معمولی ریلیف ملنے کی توقع ہے۔ سرکاری ذرائع کے مطابق آئندہ 15 روز کے لیے نئی قیمتوں کا اعلان اتوار کو کیا جائے گا۔

ابتدائی تخمینوں کے مطابق:

پیٹرول کی قیمت میں 3 روپے 70 پیسے فی لٹر کمی متوقع ہے۔

ہائی اسپیڈ ڈیزل میں 4 روپے 28 پیسے فی لٹر کمی کا امکان ہے۔

مٹی کے تیل کی قیمت میں 73 پیسے جبکہ لائٹ ڈیزل آئل میں 6 روپے 35 پیسے کمی کا امکان ظاہر کیا گیا ہے۔

اوگرا اپنی قیمتوں کی سمری ہفتہ کے روز پیٹرولیم ڈویژن کو بھیجے گا، جس کے بعد وزارتِ خزانہ اور پیٹرولیم ڈویژن سفارشات وزیراعظم شہباز شریف کو ارسال کریں گے۔ حتمی منظوری وزیراعظم ہی دیں گے۔

قیمتوں میں ممکنہ کمی کے بعد:

پیٹرول کی نئی قیمت 261 روپے 75 پیسے فی لٹر

ہائی اسپیڈ ڈیزل کی نئی قیمت 280 روپے 12 پیسے فی لٹر ہونے کا امکان ہے۔

گزشتہ پندرہ روزہ جائزے میں حکومت نے ڈیزل کی قیمت میں 6 روپے اضافہ کیا تھا جبکہ پیٹرول کی قیمت برقرار رکھی گئی تھی۔

دریں اثنا، سینیٹ کو پیٹرولیم ڈویژن کی جانب سے سڑکوں کی تعمیر کے لیے نافذ کردہ اضافی لیوی سے متعلق بریفنگ بھی دی گئی۔ بریفنگ کے مطابق حکومت نے 16 اپریل سے پیٹرول پر 8 روپے اور ڈیزل پر 7 روپے فی لٹر اضافی لیوی لگائی تھی، جس کے تحت 30 ستمبر تک صارفین سے مجموعی طور پر 66.13 ارب روپے وصول کیے گئے۔ یہ لیوی اب بھی پیٹرولیم قیمتوں کا حصہ ہے۔