خالصتان تحریک سے وابستہ رہنما گرپتونت سنگھ نے ایک ویڈیو بیان میں بھارت میں بڑھتے ہوئے ہندوتوا بیانیے اور اقلیتوں کے خدشات پر شدید تنقید کی ہے۔ بیان میں انہوں نے بھارتی وزیرِاعظم نریندر مودی کی پالیسیوں کو اقلیتوں خصوصاً مسلمانوں کے لیے نقصان دہ قرار دیا۔
بیان میں انہوں نے بابری مسجد کی شہادت اور اس کے بعد رام مندر کی تعمیر کو مسلمانوں کے جذبات مجروح کرنے والا واقعہ قرار دیا اور دعویٰ کیا کہ بھارت میں مذہبی سیاست تیزی سے مضبوط ہو رہی ہے، جس کے منفی اثرات اقلیتوں پر پڑ رہے ہیں۔
ترجمانوں کے مطابق گرپتونت سنگھ نے رام مندر کی تعمیر اور ہندوتوا نظریے کے فروغ پر اعتراض اٹھاتے ہوئے کہا کہ یہ اقدامات ملک میں مذہبی ہم آہنگی کو متاثر کر رہے ہیں۔ انہوں نے یہ بھی دعویٰ کیا کہ بھارت میں اقلیتیں خاص طور پر سیاسی ماحول میں خود کو غیر محفوظ محسوس کر رہی ہیں۔
آزاد مبصرین اور انسانی حقوق کے حلقے بھی حالیہ برسوں میں بھارت میں مذہبی انتہا پسندی، عدم برداشت اور اقلیتوں کے لیے بڑھتے ہوئے خطرات پر تشویش ظاہر کرتے رہے ہیں۔ کئی رپورٹس کے مطابق مذہبی کشیدگی اور سیاسی تقسیم میں اضافہ ہوا ہے، جس پر عالمی اداروں نے بھی سوالات اٹھائے ہیں۔
تجزیہ کاروں کا کہنا ہے کہ بھارت جیسے بڑے اور کثیرالثقافتی ملک میں مذہبی ہم آہنگی، آئینی مساوات اور اقلیتوں کے حقوق کا تحفظ جمہوریت کے استحکام کے لیے ناگزیر ہے۔
