عمران خان سے ملاقات میں رکاوٹیں ڈالنے پر وزیر اعلیٰ کے پی نے مریم نواز کو باضابطہ خط لکھا دیا

وزیراعلیٰ خیبر پختونخوا محمد سہیل خان آفریدی نے وزیراعلیٰ پنجاب مریم نواز کو باضابطہ خط لکھ کر اڈیالہ جیل میں سابق وزیراعظم عمران خان سے ملاقاتوں میں مبینہ رکاوٹوں پر شدید تشویش کا اظہار کیا ہے۔
خط میں مؤقف اختیار کیا گیا ہے کہ عدالتی احکامات کے باوجود عمران خان سے ملاقاتوں کو روکنا ناقابلِ قبول ہے۔ وزیراعلیٰ نے الزام لگایا کہ عمران خان کی بہنوں سمیت اہلِ خانہ کے ساتھ بدسلوکی کی گئی جبکہ بزرگ خواتین کو جیل کے باہر سڑک پر بٹھایا گیا، جسے انہوں نے انسانی، اخلاقی اور سماجی اقدار کے منافی قرار دیا۔
وزیراعلیٰ آفریدی نے اپنے خط میں وزیراعلیٰ پنجاب سے چار فوری مطالبات کیے ہیں:

عدالتی احکامات پر فوری عملدرآمد

اہلِ خانہ سے بدسلوکی کرنے والے اہلکاروں کے خلاف کارروائی

جیل و پولیس انتظامیہ کو واضح ہدایت نامہ جاری کرنا

ملاقاتوں کے لیے باوقار اور قانونی نظام کا قیام

ان کا کہنا ہے کہ عمران خان سابق وزیراعظم اور پی ٹی آئی کے قائد ہیں، اور کے پی حکومت انہی کے مینڈیٹ پر قائم ہے، اس لیے ان کے ساتھ اس قسم کا سلوک برداشت نہیں کیا جائے گا۔
وزیراعلیٰ نے پنجاب حکومت سے مطالبہ کیا ہے کہ معاملے پر فوری ایکشن لیا جائے تاکہ سیاسی قیادت اور شہریوں کے بنیادی حقوق کا تحفظ یقینی بنایا جا سکے۔