اپوزیشن اتحاد کا آج سے آئین کی بحالی کی تحریک شروع کرنے کا اعلان

اپوزیشن اتحاد نے آئین کی بحالی کی تحریک کا آغاز، پارلیمنٹ سے سپریم کورٹ تک واک کا اعلان
اسلام آباد: اپوزیشن اتحاد نے آج آئین کی بحالی کی تحریک شروع کرنے کا اعلان کرتے ہوئے پارلیمنٹ سے سپریم کورٹ تک واک نکالنے کا اعلان کیا ہے۔
پی ٹی آئی رہنما اسد قیصر نے کہا کہ امن و امان قائم رکھنا حکومت اور سکیورٹی اداروں کی ذمہ داری ہے، تاہم حکومت سارا دن مخالفین کے خلاف کیسز بنانے اور ناجائز آئینی ترامیم کرنے میں مصروف ہے۔
مجلس وحدت المسلمین کے علامہ راجا ناصر عباس نے کہا کہ یہ ملک میں باہر نکلنے کا وقت ہے تاکہ آئندہ نسلوں کو بچایا جا سکے۔
دوسری جانب لاہور ہائیکورٹ بار کے جنرل ہاؤس اجلاس میں وکلا نے احتجاج کرتے ہوئے ریلی نکالی اور 27 ویں ترمیم کے خلاف نعرے لگائے۔ وکلا نے جی پی او چوک سے ججز گیٹ اشارے تک ریلی نکالی، جس کے دوران سلمان اکرم راجا نے کہا کہ "ہمیں اپنی نسلوں کے لیے اٹھنا ہوگا، گھروں میں نہیں بیٹھ سکتے۔”
یہ تحریک آئین کی بالادستی اور جمہوری اصولوں کے نفاذ کے لیے اپوزیشن کا اہم اقدام قرار دی جا رہی ہے۔