لندن (مانیٹرنگ ڈیسک) — برطانوی حکومت ملک چھوڑنے والے دولت مند افراد پر 20 فیصد "ایگزٹ ٹیکس” عائد کرنے پر غور کر رہی ہے۔ اس مجوزہ اقدام کا مقصد ٹیکس سے بچاؤ کی کوششوں کو روکنا اور ملک کے عوامی مالیات میں اضافی آمدن پیدا کرنا ہے۔
دی ٹائمز کی رپورٹ کے مطابق، چانسلر ریچل ریوز ایک نئے "سیٹلنگ اپ چارج” (Settling Up Charge) کے نفاذ پر غور کر رہی ہیں، جس کا اطلاق ان کاروباری اور سرمایہ کاری کے اثاثوں پر ہوگا جو دولت مند تارکین وطن برطانیہ چھوڑنے کے وقت پیچھے چھوڑ دیتے ہیں۔ اس ٹیکس کا ہدف ان اثاثوں پر حاصل ہونے والا غیر حقیقی منافع (unrealised gains) ہوگا۔
ماہرین کے مطابق، اس اقدام سے حکومت کو تقریباً 2 بلین پاؤنڈ سالانہ اضافی ریونیو حاصل ہونے کا امکان ہے۔ اگر یہ ٹیکس نافذ ہوا تو برطانیہ ان ممالک کی صف میں شامل ہو جائے گا جہاں ایگزٹ ٹیکس کا نظام پہلے سے موجود ہے، جن میں امریکا، فرانس، جرمنی اور کینیڈا شامل ہیں، جبکہ اٹلی اس فہرست سے باہر ہے۔
فی الحال، برطانیہ چھوڑنے والے افراد اپنے اثاثے ملک سے باہر منتقل کرنے کے بعد کیپٹل گین ٹیکس (CGT) ادا کیے بغیر فروخت کر سکتے ہیں، جو عموماً 20 فیصد تک وصول کیا جاتا ہے۔ نئی پالیسی اس خلا کو پُر کرنے اور ٹیکس نیٹ کو مضبوط بنانے کی ایک بڑی کوشش سمجھی جا رہی ہے۔
