عہدہ چھوڑنے سے قبل گنڈاپور نے صوبے میں پی ٹی آئی کیخلاف 9 مئی کا باب بند کردیا

اسلام آباد: خیبر پختونخوا کے سابق وزیراعلیٰ علی امین گنڈا پور نے اپنے دورِ حکومت میں پاکستان تحریک انصاف (پی ٹی آئی) کے بانی عمران خان، پارٹی رہنماؤں اور کارکنوں کے خلاف 9 مئی 2023ء کے واقعات سے متعلق درج تقریباً تمام مقدمات نمٹا دیے۔
پی ٹی آئی کے سیکرٹری اطلاعات وقاص اکرم شیخ کے مطابق، صوبے میں 9 مئی کے احتجاج کے دوران پی ٹی آئی کارکنوں کے خلاف 319 مقدمات درج کیے گئے تھے، جن میں سے 268 کیسز پولیس اور استغاثہ کی مدد سے قانونی تقاضے پورے کرتے ہوئے نمٹا دیے گئے۔ اس بات کو بھی یقینی بنایا گیا کہ یہ مقدمات مستقبل میں "بلیک میلنگ کے ہتھکنڈے” کے طور پر دوبارہ نہ کھولے جا سکیں۔
وقاص اکرم شیخ نے کہا کہ علی امین گنڈا پور نے سیاسی بنیادوں پر قائم مقدمات کو قانونی دائرے میں رہتے ہوئے ختم کر کے پارٹی کے لیے ایک ’’قابلِ تعریف قدم‘‘ اٹھایا۔
انہوں نے بتایا کہ 51 کیسز اب بھی زیرِ التوا ہیں کیونکہ ان میں نامزد افراد غیر حاضر ہیں، تاہم توقع ہے کہ یہ بھی جلد نمٹا دیے جائیں گے۔ انسدادِ دہشت گردی ایکٹ (ATA) کے تحت درج 29 مقدمات میں سے 23 نمٹائے جا چکے ہیں جبکہ 6 کیسز باقی ہیں۔
پی ٹی آئی رہنما کے مطابق، رواں ماہ کے آغاز میں اپنے استعفے سے قبل گنڈا پور کابینہ نے 9 مئی سے متعلق باقی تمام کیسز واپس لینے کی منظوری دی تھی، جس کی ایڈووکیٹ جنرل خیبر پختونخوا شاہ فیصل نے بھی تصدیق کی ہے۔
ایڈووکیٹ جنرل کی رپورٹ میں کہا گیا کہ کابینہ نے شواہد اور تحقیقات کا جائزہ لینے کے بعد ایسے مقدمات واپس لینے کا فیصلہ کیا جو سیاسی بنیادوں پر قائم کیے گئے تھے یا جن میں قانونی خامیاں پائی گئیں۔ ان کے مطابق، یہ اقدام انتظامی وسائل اور وقت کے ضیاع سے بچنے کے لیے کیا گیا۔
یاد رہے کہ 9 مئی 2023 کو پیرا ملٹری رینجرز کی جانب سے عمران خان کی گرفتاری کے بعد ملک بھر میں پرتشدد مظاہرے پھوٹ پڑے تھے۔ خیبر پختونخوا کے مختلف شہروں — پشاور، مردان، مہمند اور خیبر — میں مظاہرین نے مبینہ طور پر فوجی تنصیبات کو نشانہ بنایا تھا۔ ان واقعات کے بعد پی ٹی آئی رہنماؤں اور کارکنوں کے خلاف بڑے پیمانے پر کریک ڈاؤن کیا گیا، انسدادِ دہشت گردی کے قوانین کے تحت مقدمات درج ہوئے اور 100 سے زائد کارکنوں کو فوجی عدالتوں میں بھیجا گیا۔