پاکستان اورافغانستان میں کشیدگی ہے لیکن یہ جلد حل ہوگا،امریکی صدر ڈونلڈ ٹرمپ

امریکی صدر ڈونلڈ ٹرمپ نے کہا ہے کہ پاکستان اور افغانستان میں کشیدگی موجود ہے، لیکن یہ جلد حل ہو جائے گی۔ انہوں نے پاکستان کے وزیراعظم اور آرمی چیف کو بہترین اور قابلِ احترام شخصیات قرار دیا۔

ٹرمپ نے تھائی لینڈ اور کمبوڈیا میں جنگ بندی معاہدے پر دستخط کی تقریب سے خطاب میں کہا:
"میں پاکستان اور افغانستان دونوں کو جانتا ہوں، اور مجھے یقین ہے کہ وہ معاملہ جلد حل کر لیں گے۔ پچھلے آٹھ ماہ میں میں نے آٹھ جنگیں رکوائیں، اب دنیا میں صرف ایک جنگ باقی ہے۔”

امریکی صدر نے مزید کہا کہ ملائیشیا معاہدے کے مبصرین تعینات کرے گا اور وہ کمبوڈیا اور ملائیشیا کے ساتھ تجارتی معاہدوں کا اعلان کرنے کا ارادہ رکھتے ہیں۔ انہوں نے بتایا کہ تھائی لینڈ اور کمبوڈیا کی لڑائی کو روکا گیا، دونوں فریق تمام لڑائیوں کو ختم کرنے پر راضی ہیں، اور 18 کمبوڈیا کے جنگی قیدی رہا کیے جائیں گے۔

واضح رہے کہ حال ہی میں صدر ٹرمپ نے پاکستانی آرمی چیف جنرل عاصم منیر کو "فیورٹ فیلڈ مارشل” قرار دیا تھا، جسے انہوں نے بین الاقوامی امن اور تعاون کی تعریف کے طور پر پیش کیا۔