بجلی فی یونٹ 10 روپے مزید سستی کرنے کا فیصلہ ، تفصیلات جان کرآپ بھی حیران رہ جائیں گے
اسلام آباد (ویب ڈیسک) — وفاقی حکومت نے صنعتی اور زرعی شعبوں کے لیے بجلی کے نرخوں میں نمایاں کمی پر مبنی رعایتی پیکیج متعارف کرانے کا فیصلہ کیا ہے۔
ذرائع کے مطابق مجوزہ منصوبے کے تحت بجلی کی قیمتوں میں 10 روپے فی یونٹ سے زائد کمی کی جا سکتی ہے، جس سے پیداواری لاگت میں نمایاں کمی، برآمدات میں اضافہ اور ملکی معیشت میں بہتری کی توقع ہے۔
ذرائع نے مزید بتایا کہ یہ رعایتی پیکیج تین سال کے لیے نافذ العمل ہوگا، جو یکم نومبر 2025 سے شروع ہو کر 31 اکتوبر 2028 تک جاری رہے گا۔ وزیراعظم شہباز شریف کی جانب سے اس منصوبے کا باضابطہ اعلان آج کیے جانے کا امکان ہے۔
منصوبے کے مطابق اضافی بجلی استعمال کرنے والے صنعتی اور زرعی صارفین کو رعایتی نرخوں پر بجلی فراہم کی جائے گی، تاکہ توانائی کے مؤثر استعمال، پیداواری کارکردگی میں بہتری اور صنعتی سرگرمیوں میں اضافہ ممکن بنایا جا سکے۔
حکومتی ذرائع کا کہنا ہے کہ اس اقدام کا مقصد کاروباری اداروں پر توانائی کے بڑھتے ہوئے اخراجات کا بوجھ کم کرنا اور پیداواری لاگت گھٹا کر برآمدات کو فروغ دینا ہے۔
ماہرین کے مطابق بجلی کے نرخوں میں کمی سے ملکی صنعت بین الاقوامی سطح پر زیادہ مسابقت کے قابل ہو جائے گی، جبکہ اقتصادی سرگرمیوں میں خاطر خواہ تیزی اور روزگار کے مواقع میں اضافے کی بھی توقع ہے۔
حکومت کو امید ہے کہ اس رعایتی پیکیج کے ذریعے صنعتی شعبے میں استحکام، زرعی پیداوار میں اضافہ اور پائیدار معاشی ترقی کے اہداف حاصل کیے جا سکیں گے۔
