پاکستان نے معاشی میدان میں نمایاں کامیابیاں حاصل کی ہیں، وزیر خزانہ محمد اورنگزیب

اسلام آباد: وزیر خزانہ محمد اورنگزیب نے کہا ہے کہ پاکستان نے معاشی محاذ پر اہم کامیابیاں حاصل کی ہیں جن میں معاشی استحکام، زرمبادلہ کے ذخائر میں بہتری، افراطِ زر میں کمی اور پالیسی ریٹ میں نمایاں کمی شامل ہیں۔

چینی میڈیا کو دیے گئے ایک انٹرویو میں وزیر خزانہ نے بتایا کہ مہنگائی کی شرح سنگل ڈیجٹ (یعنی 10 فیصد سے کم) پر آ چکی ہے، جبکہ ملک کے زرمبادلہ کے ذخائر ڈھائی ماہ کی درآمدات کے لیے کافی ہیں۔ انہوں نے کہا کہ یہ مثبت معاشی اشاریے پاکستان کی اقتصادی پالیسیوں پر اعتماد کا مظہر ہیں۔

محمد اورنگزیب نے مزید کہا کہ بین الاقوامی سطح پر بھی ان کامیابیوں کو تسلیم کیا گیا ہے، اور عالمی ریٹنگ ایجنسیوں — فچ، ایس اینڈ پی اور موڈیز — نے پاکستان کی کریڈٹ ریٹنگ میں بہتری کی ہے، جو کہ معیشت کے لیے حوصلہ افزا اشارہ ہے۔

وزیر خزانہ کے مطابق گزشتہ مالی سال کے دوران پاکستان کی مجموعی ملکی پیداوار (جی ڈی پی) میں 3 فیصد اضافہ ہوا، جبکہ رواں مالی سال کے لیے ترقی کا ہدف 4 فیصد رکھا گیا تھا۔ تاہم، حالیہ سیلاب کی وجہ سے اس ہدف میں کچھ کمی کا امکان ہے۔

انہوں نے پُرامیدی کا اظہار کرتے ہوئے کہا کہ رواں مالی سال کے دوران 3.5 فیصد شرح نمو حاصل کرنے کی کوشش کی جا رہی ہے۔

محمد اورنگزیب نے یہ بھی بتایا کہ چین پاکستان اقتصادی راہداری (CPEC) کے دوسرے مرحلے میں اہم پیش رفت ہوئی ہے، جو ملک کی اقتصادی ترقی اور سرمایہ کاری کے فروغ میں کلیدی کردار ادا کرے گی۔