پاکستان اور افغانستان کے درمیان دوحہ مذاکرات کامیاب، فوری جنگ بندی پر اتفاق

دوحہ — اسلامی جمہوریہ پاکستان اور افغانستان کے درمیان دوحہ، قطر میں ہونے والے 13 گھنٹے طویل مذاکرات کامیابی سے مکمل ہو گئے۔ مذاکرات کے اختتام پر دونوں ممالک نے فوری جنگ بندی اور دوطرفہ امن و استحکام کے لیے ایک مستقل مکینزم پر اتفاق کیا۔

مذاکرات کی میزبانی ریاستِ قطر نے کی جبکہ جمہوریہ ترکیہ نے ثالثی کا کردار ادا کیا۔ قطر کی وزارتِ خارجہ نے اس پیش رفت کو خطے میں امن و استحکام کی جانب ایک اہم قدم قرار دیا ہے۔

سرکاری ذرائع کے مطابق یہ معاہدہ پاکستان کی "پوزیشن آف اسٹرینتھ” کا نتیجہ ہے، جہاں افواجِ پاکستان کی جانب سے زمینی سطح پر بھرپور اور واضح ردِعمل کے بعد افغان فریق کو مؤثر پیغام دیا گیا۔ نتیجتاً مذاکرات میں پاکستان کا دیرینہ مطالبہ تسلیم کر لیا گیا، جس میں افغانستان سے دہشت گردی کی ہر قسم کی حمایت اور سہولت کاری کے خاتمے کا تقاضا شامل تھا۔

ذرائع کا کہنا ہے کہ مذاکرات کے دوران افغان فریق کی جانب سے کوئی قابلِ ذکر مطالبہ پیش نہیں کیا گیا، جبکہ پاکستان کا مؤقف مکمل طور پر تسلیم کیا گیا۔ حساس نوعیت کے باعث مذاکرات کی مکمل تفصیلات کو عوامی نہیں کیا گیا، جسے سفارتی ذرائع افغان فریق کو "چہرہ بچانے” کا موقع دینے کے طور پر دیکھ رہے ہیں۔

معاہدے کے تحت افغانستان سے پاکستان کی سرزمین پر دہشت گردی کے واقعات کو فوری طور پر بند کیا جائے گا۔ دونوں ممالک نے اس بات پر بھی اتفاق کیا ہے کہ مذاکرات کا تسلسل جاری رکھا جائے گا تاکہ طے شدہ نکات پر مکمل عمل درآمد کو یقینی بنایا جا سکے۔

اگلا فالو اپ اجلاس 25 اکتوبر کو ترکی کے شہر استنبول میں منعقد ہوگا، جہاں دونوں ممالک کے اعلیٰ سطحی وفود مزید تفصیلات پر بات چیت کریں گے۔

یہ پیش رفت نہ صرف دونوں ہمسایہ ممالک کے تعلقات میں ایک نئے باب کا آغاز ہے بلکہ خطے میں دیرپا امن کے امکانات کو بھی روشن کر رہی ہے۔