اسلام آباد میں تحریک لبیک پاکستان (TLP) کے دفاتر سیل، ضلعی انتظامیہ کا اقدام
اسلام آباد (16 اکتوبر 2025) – وفاقی دارالحکومت اسلام آباد میں ضلعی انتظامیہ نے تحریک لبیک پاکستان (ٹی ایل پی) کے متعدد دفاتر سیل کر دیے ہیں۔ ذرائع کے مطابق یہ کارروائیاں بھارہ کہو، سواں اور دیگر علاقوں میں کی گئیں۔
انتظامیہ کے مطابق دفاتر کو سیل کرنے کا اقدام امن و امان کی صورتحال کو مدنظر رکھتے ہوئے کیا گیا ہے۔ کارروائی کے دوران پولیس کی بھاری نفری بھی موجود رہی تاکہ کسی ناخوشگوار واقعے سے بچا جا سکے۔
اس سے قبل لاہور میں بھی ٹی ایل پی کے مظاہرین کے خلاف سخت اقدامات کیے گئے تھے، جہاں پولیس کی مدعیت میں مختلف تھانوں میں 25 مقدمات درج کیے گئے۔ یہ مقدمات اسلام پورہ، نیو انار کلی، شفیق آباد، گوالمنڈی، بادامی باغ اور شاہدرہ کے تھانوں میں درج ہوئے۔
حکام کے مطابق کارروائیاں قانون کی خلاف ورزی، توڑ پھوڑ، اور امن عامہ میں خلل ڈالنے کے الزامات کے تحت کی گئیں۔
تاحال تحریک لبیک پاکستان کی جانب سے اسلام آباد میں دفاتر سیل کیے جانے پر کوئی باضابطہ ردِعمل سامنے نہیں آیا۔
