اسلام آباد – پاکستان اور سعودی عرب کے درمیان تجارت اور سرمایہ کاری کے فروغ پر اہم پیش رفت ہوئی ہے۔ دونوں ممالک نے باہمی معاشی تعاون کو نئی سطح تک لے جانے پر اتفاق کر لیا ہے۔
سرکاری اعلامیے کے مطابق اسلام آباد میں سعودی-پاک مشترکہ بزنس کونسل کا اجلاس منعقد ہوا، جس میں دونوں ممالک کے اعلیٰ سرکاری و نجی نمائندوں نے شرکت کی۔ اجلاس میں سعودی وفد کی قیادت چیئرمین سعودی-پاک بزنس کونسل شہزادہ منصور بن محمد السعود نے کی، جبکہ پاکستانی جانب سے وفاقی وزراء، حکومتی اداروں کے نمائندے اور معروف کاروباری شخصیات شریک ہوئیں۔
اجلاس کے دوران سعودی وفد کو پاکستان میں موجود سرمایہ کاری کے وسیع مواقع سے آگاہ کیا گیا۔ خصوصی سرمایہ کاری سہولت کونسل (SIFC) کے حکام نے وزارتِ تجارت کے تعاون سے وفد کو تفصیلی بریفنگ دی۔ اس دوران وفد نے پاکستان کی نمایاں کمپنیوں کے عہدیداروں سے بھی ملاقاتیں کیں، جن میں ترجیحی شعبہ جات میں سرمایہ کاری کے امکانات پر تفصیلی تبادلہ خیال ہوا۔
اعلامیے میں بتایا گیا کہ سعودی کاروباری شخصیات پر مشتمل یہ اعلیٰ سطحی وفد پانچ روزہ دورے پر پاکستان میں موجود ہے۔ اس دورے کو سعودی وژن 2030 اور پاکستان میں غیرملکی سرمایہ کاری کے فروغ کے تناظر میں ایک اہم سنگ میل قرار دیا جا رہا ہے۔
اقتصادی ماہرین کا کہنا ہے کہ اگر دونوں ممالک اس اتفاق رائے کو عملی جامہ پہناتے ہیں تو اس سے پاکستان میں روزگار کے مواقع، تجارتی حجم اور اقتصادی ترقی میں نمایاں بہتری ممکن ہو سکتی ہے۔
