پیرس: فرانس کی جانب سے آج فلسطینی ریاست کو باضابطہ طور پر تسلیم کیے جانے کا اعلان متوقع ہے۔ اس سلسلے میں ایک علامتی اقدام کے طور پر ایفل ٹاور پر فلسطین اور اسرائیل دونوں کے پرچم آویزاں کر دیے گئے، جسے اقوام متحدہ میں فرانسیسی مؤقف کی بھرپور عکاسی قرار دیا جا رہا ہے۔
پیرس میں فلسطینی پرچم لہرانا فرانسیسی حکومت کی جانب سے عالمی برادری کو ایک واضح پیغام ہے کہ وہ فلسطین کے حقِ خودارادیت کی حمایت کرتی ہے۔ ذرائع کے مطابق، یہ اقدام اقوام متحدہ میں فرانسیسی صدر ایمانوئل میکرون کے مجوزہ اعلان کی حمایت کے طور پر اٹھایا گیا ہے۔
میکرون: حماس کو ختم کرنا جنگ کا حل نہیں
اس سے قبل، فرانسیسی صدر ایمانوئل میکرون نے ایک امریکی ٹی وی کو دیے گئے انٹرویو میں کہا کہ:
"اسرائیل نے حماس کے کئی رہنماؤں کو قتل کیا، لیکن اس کے باوجود حماس کو ختم نہ کیا جا سکا۔ جتنے جنگجو مارے گئے، اتنے ہی نئے بھرتی کر لیے گئے۔”
انہوں نے واضح کیا کہ:
"اب بھی حماس کے پاس وہی عسکری طاقت ہے جو جنگ کے آغاز میں تھی۔ حماس کا خاتمہ جنگ کے خاتمے کی ضمانت نہیں ہے، بلکہ یہ جنگ خود اسرائیل کی ساکھ کو بین الاقوامی سطح پر نقصان پہنچا رہی ہے۔”
عالمی برادری میں فلسطین کی حمایت میں اضافہ
فرانس سے قبل برطانیہ، آسٹریلیا، کینیڈا، پرتگال اور کئی دیگر ممالک نے بھی فلسطینی ریاست کو تسلیم کرنے کا اعلان کیا تھا، جو کہ دو ریاستی حل کی عالمی کوششوں کا حصہ ہے۔
فرانسیسی اقدام کو یورپی سیاست میں ایک اہم تبدیلی اور مشرقِ وسطیٰ میں امن و استحکام کے قیام کی طرف ایک قدم قرار دیا جا رہا ہے۔
