راولپنڈی: توشہ خانہ ٹو کیس میں سابق وزیرِ اعظم عمران خان کے سابق ملٹری سیکرٹری بریگیڈیئر ریٹائرڈ محمد احمد کا اہم بیان سامنے آگیا ہے، جس میں انہوں نے سعودی ولی عہد سے ملنے والے قیمتی تحائف توشہ خانہ میں جمع نہ کرانے کا انکشاف کیا ہے۔
جیو نیوز کو موصول دستاویزات کے مطابق بریگیڈیئر ریٹائرڈ محمد احمد نے عدالت میں ریکارڈ کروائے گئے بیان میں کہا کہ انہوں نے 15 مئی 2020 سے 10 اپریل 2022 تک ملٹری سیکرٹری کی حیثیت سے خدمات انجام دیں۔ ان کے مطابق 7 مئی 2021 سے 10 مئی 2021 کے دوران سعودی عرب کے دورے میں وہ عمران خان کے ہمراہ تھے۔
بیان کے مطابق عمران خان اور ان کی اہلیہ بشریٰ بی بی نے سعودی ولی عہد محمد بن سلمان کی جانب سے دیے گئے تحائف توشہ خانہ میں جمع نہ کرانے کی ہدایت کی۔ ان تحائف میں بلغاری جیولری سیٹ، عود کی بوتلیں، زیتون کا تیل، کھجوریں اور ایک کتاب شامل تھی۔
سابق ملٹری سیکرٹری نے بتایا کہ ان تمام تحائف کی تصاویر سرکاری پروٹوکول کے مطابق بنائی گئیں، اور انہوں نے نیب اور ایف آئی اے کے سامنے بھی اپنے بیانات ریکارڈ کروائے ہیں۔ ان کا کہنا تھا کہ غیر ملکی دوروں کے دوران تحائف کی وصولی کے وقت وزارتِ خارجہ کے نمائندے موجود ہوتے ہیں، اور سعودی عرب سے ملنے والے تحائف سے متعلق وزارتِ خارجہ نے تحریری طور پر وزیرِ اعظم آفس کو آگاہ کیا تھا۔
بیان میں مزید کہا گیا کہ توشہ خانہ کابینہ ڈویژن کے ماتحت ادارہ ہے، اور سعودی تحائف کی مالیت 29 لاکھ 14 ہزار 500 روپے لگائی گئی تھی۔ بشریٰ بی بی نے ان تحائف کے بدلے رقم جمع کروائی، جبکہ توشہ خانہ سیکشن کی طرف سے کوئی اعتراض سامنے نہیں آیا۔ مالیت کے تعین اور توشہ خانہ سے خط و کتابت ڈپٹی ملٹری سیکرٹری نے عمران خان کی ہدایت پر کی۔
ایف آئی اے حکام کے مطابق اصل میں بلغاری جیولری سیٹ کی قیمت 7 کروڑ 50 لاکھ روپے تھی، جبکہ عمران خان نے ایک نجی اپریزر کے ذریعے اس کی قیمت 59 لاکھ روپے لگوائی اور صرف 29 لاکھ روپے قومی خزانے میں جمع کروائے۔ جیولری سیٹ میں نیکلس، بریسلیٹ، ایئررنگز اور انگوٹھی شامل تھی۔
یاد رہے کہ اس سے قبل توشہ خانہ ٹو کیس میں عمران خان کے سابق پرسنل سیکرٹری انعام اللہ شاہ اور نجی اپریزر صہیب عباسی کے بیانات بھی ریکارڈ پر آ چکے ہیں۔
