دبئی: ایشیا کپ سپر فور مرحلے میں پاکستان کو بھارت کے خلاف بھارتی غرور خاک میں ملانے کا سنہری موقع میسر آگیا ہے۔ دونوں روایتی حریف ٹیمیں ایک بار پھر اتوار کو دبئی کے میدان میں آمنے سامنے ہوں گی، جہاں شائقین کرکٹ کو ایک اور سنسنی خیز مقابلے کی امید ہے۔
گرین شرٹس اس بار پہلے میچ کی شکست کا بدلہ لینے کے لیے پرعزم ہیں اور مکمل تیاری کے ساتھ میدان میں اتریں گے۔ ٹیم پاکستان نے ہفتے کے روز بھرپور پریکٹس سیشن کیا، تاہم پریس کانفرنس سے گریز کیا گیا، جیسا کہ یو اے ای کے خلاف میچ سے قبل بھی کیا گیا تھا۔
پاکستانی ٹیم کی تیاری اور مسائل
پاکستانی ٹیم کی سب سے بڑی تشویش غیر مستقل مزاج ٹاپ آرڈر ہے۔ نوجوان اوپنر صائم ایوب ایشیا کپ کے تینوں میچز میں صفر پر آؤٹ ہوئے، جو ٹیم کے لیے تشویشناک ہے۔ اب ان سے اور صاحبزادہ فرحان سے ذمہ داری بھرے کھیل کی توقع ہے، جبکہ فخر زمان کو بھی اپنی جارحانہ بیٹنگ کا مظاہرہ کرنا ہوگا۔ حسن نواز اور محمد حارث پر بھی اسکور کو مستحکم کرنے کی بھاری ذمہ داری ہوگی۔
گزشتہ میچ میں یو اے ای کے خلاف پاکستان نے دو تبدیلیاں کیں: سفیان مقیم اور فہیم اشرف کی جگہ حارث رؤف اور خوشدل شاہ کو ٹیم میں شامل کیا گیا۔ حارث رؤف کو برقرار رکھنے کا امکان ہے۔
بھارتی ٹیم دباؤ میں، اکشر پٹیل کی شرکت مشکوک
دوسری جانب، بھارت اگرچہ ناقابل شکست رہا ہے، مگر عمان کے خلاف اوسط درجے کی کارکردگی کے باعث اس کے اعصاب پر دباؤ بڑھ گیا ہے۔ فیلڈنگ کے دوران اکشر پٹیل کو سر پر چوٹ لگنے کے بعد ان کی اگلے میچ میں شرکت مشکوک ہے، جس سے بھارتی اسپن کمبی نیشن متاثر ہوسکتا ہے۔
عمان کے خلاف میچ میں بھارتی ٹیم کو سست پچ پر بیٹنگ میں مشکلات کا سامنا رہا، اور 8 بولرز آزمانے کے باوجود وہ صرف 4 وکٹیں حاصل کر سکے۔ پاکستان کے پاس شاہین آفریدی کی شکل میں خطرناک لیفٹ آرم سوئنگ بولر موجود ہے جو بھارتی ٹاپ آرڈر کے لیے چیلنج بن سکتے ہیں۔
پچ کی صورتحال اور ٹاس کا کردار
دبئی کی پچ حسب روایت اسپنرز کے لیے سازگار ہے، اور یہاں ہدف کا تعاقب کرنے والی ٹیموں کو نسبتاً برتری حاصل رہی ہے۔ گزشتہ 5 میچز میں سے 3 بار ہدف کا تعاقب کرنے والی ٹیمیں کامیاب رہیں۔ اس لیے ٹاس کا کردار فیصلہ کن ہوسکتا ہے، اور توقع ہے کہ جو ٹیم ٹاس جیتے گی، وہ پہلے فیلڈنگ کو ترجیح دے گی۔
مداحوں میں جوش، ٹکٹوں کی مانگ میں اضافہ
میچ سے قبل ٹکٹوں کی فروخت میں زبردست اضافہ دیکھنے میں آیا ہے، اور دبئی اسٹیڈیم میں ایک بار پھر فل ہاؤس ہونے کا امکان ہے۔ پاک بھارت مقابلہ ہمیشہ کی طرح نہ صرف ایشیا بلکہ دنیا بھر کے شائقین کرکٹ کی توجہ کا مرکز بنا ہوا ہے۔
