کراچی: پاکستان اسٹاک ایکسچینج (PSX) میں کاروباری ہفتے کے دوسرے روز بھی مندی کا رجحان برقرار ہے، جب کہ انٹر بینک مارکیٹ میں امریکی ڈالر کی قدر میں معمولی کمی واقع ہوئی ہے۔
جمعرات کے روز کاروبار کے آغاز سے ہی اسٹاک مارکیٹ میں منفی رجحان دیکھا گیا، جس کے نتیجے میں 100 انڈیکس 769 پوائنٹس کی کمی کے ساتھ 1,55,371 پوائنٹس کی سطح پر ٹریڈ کرتا دکھائی دیا۔
یاد رہے کہ گزشتہ روز بھی اسٹاک مارکیٹ میں شدید مندی ریکارڈ کی گئی تھی، جہاں 100 انڈیکس 879 پوائنٹس کی کمی سے 1,56,141 پوائنٹس پر بند ہوا۔ دورانِ ٹریڈنگ ایک موقع پر انڈیکس 795 پوائنٹس کے اضافے کے ساتھ 1,57,816 کی سطح تک بھی پہنچا تھا، تاہم یہ برتری برقرار نہ رہ سکی۔
دوسری جانب ایکسچینج کمپنیز ایسوسی ایشن آف پاکستان کے مطابق، انٹر بینک مارکیٹ میں امریکی ڈالر 6 پیسے سستا ہوکر 281 روپے 50 پیسے کی سطح پر ٹریڈ کر رہا ہے۔
ماہرین کے مطابق اسٹاک مارکیٹ میں جاری مندی سرمایہ کاروں کے اعتماد میں کمی اور معاشی غیر یقینی صورتحال کا مظہر ہے، جب کہ ڈالر کی قدر میں معمولی کمی درآمدی شعبے کے لیے وقتی ریلیف ضرور ثابت ہو سکتی ہے۔
