دریائے چناب میں اونچے درجے کا سیلاب، مظفر گڑھ کے سیکڑوں دیہات زیرِ آب، نقل مکانی جاری

مظفر گڑھ/اوکاڑہ: دریائے چناب میں اونچے درجے کے سیلاب کے باعث مظفر گڑھ کے سیکڑوں دیہات زیرِ آب آ گئے، جبکہ بڑی تعداد میں متاثرہ افراد محفوظ مقامات کی جانب نقل مکانی کر رہے ہیں۔

پولیس کے مطابق، گزشتہ 24 گھنٹوں میں ایک ہزار سے زائد افراد کو ریسکیو کر کے محفوظ مقامات پر منتقل کیا گیا ہے۔ امدادی کارروائیاں رنگپور، دوآبہ، سنکی، خان گڑھ، وہیلاں والی، بنڈہ اسحاق اور عظمت پور جیسے علاقوں میں جاری ہیں۔

ریسکیو آپریشن کے دوران ضلع بھر میں ریسکیو کی 32 کشتیاں اور پولیس کی 8 کشتیاں سرگرم عمل ہیں۔ اس کے علاوہ فوج، وائلڈ لائف اور پرائیویٹ کشتیوں کی مدد سے بھی لوگوں کو محفوظ مقامات تک پہنچایا جا رہا ہے۔

ادھر اوکاڑہ کی ضلعی انتظامیہ نے بتایا ہے کہ دریائے راوی اور دریائے ستلج میں بھی سیلابی صورتحال برقرار ہے۔ خطرے کے پیشِ نظر 32 دیہات کے تمام سرکاری و نجی اسکولوں کی تعطیلات میں 8 سے 14 ستمبر تک توسیع کر دی گئی ہے۔

پنجاب کے دریاؤں میں طغیانی برقرار: پی ڈی ایم اے

ترجمان پنجاب ڈیزاسٹر مینجمنٹ اتھارٹی (پی ڈی ایم اے) کے مطابق، پنجاب کے بڑے دریاؤں میں طغیانی کی صورتحال بدستور برقرار ہے۔

دریائے ستلج میں:

گنڈا سنگھ والا کے مقام پر انتہائی اونچے درجے کا سیلاب۔

سلیمانکی کے مقام پر اونچے درجے کا سیلاب۔

دریائے چناب میں:

خانکی ہیڈ ورکس پر نچلے درجے کا سیلاب۔

دریائے راوی میں:

شاہدرہ اور ہیڈ سدھنائی کے مقامات پر اونچے درجے کا سیلاب۔

ترجمان کے مطابق، 9 ستمبر تک دریاؤں میں انتہائی اونچے درجے کے سیلاب کا خدشہ برقرار ہے۔ بالائی علاقوں میں ہونے والی شدید بارشوں کے باعث پانی کے بہاؤ میں مزید اضافے کا امکان ہے۔

حکام نے نشیبی علاقوں کے رہائشیوں کو فوری طور پر محفوظ مقامات پر منتقل ہونے اور الرٹ رہنے کی ہدایت کی ہے۔