جموں (خصوصی رپورٹ): بھارت کے زیر قبضہ جموں کے علاقے اکھنور سے نکلا دوسرا بڑا سیلابی ریلا پاکستان کے دریائے چناب میں داخل ہو گیا ہے، جس کے باعث ہیڈ مرالہ پر انتہائی اونچے درجے کا سیلابی ہنگامی الرٹ جاری کر دیا گیا ہے۔ انتظامیہ نے حفاظتی اقدامات کے طور پر چناب پل کو تمام قسم کی ٹریفک کے لیے بند کر دیا ہے۔
پاکستانی حکام کے مطابق سیلابی پانی ہیڈ خانکی کی جانب بڑھ رہا ہے، جس کے پیش نظر 450 سے زائد دیہات کو خالی کروا لیا گیا ہے تاکہ انسانی جانوں کو تحفظ فراہم کیا جا سکے۔ پانی کے بہاؤ میں اضافہ ہونے پر ہیڈ خانکی کے قریب پانی کا دباؤ کم کرنے کے لیے شگاف کھولنے کی تیاریاں کی جا رہی ہیں۔
بھلوال کے علاقے میں شدید کٹاؤ سے زرعی اراضی کو نقصان پہنچا ہے جبکہ دریائے راوی کا پانی ملتان کی جانب بڑھ رہا ہے جہاں ریلوے ٹریک کے قریب پانی گزرنا شروع ہو چکا ہے۔ ملتان میں فلڈ بند پر پانی کا دباؤ کم کرنے کے لیے شگاف ڈالنے کا امکان ہے۔
انتظامیہ نے عوام سے درخواست کی ہے کہ وہ حفاظتی ہدایات پر سختی سے عمل کریں اور صورتحال پر نظر رکھیں۔
