بھارت نے دریائے ستلج میں اضافی پانی چھوڑنے کا فیصلہ کر لیا ، ہنگامی الرٹ جاری

اسلام آباد: بھارت نے دریائے ستلج میں اضافی پانی چھوڑنے کا فیصلہ کر لیا ہے، جس کے بعد وزارت آبی وسائل نے ممکنہ شدید سیلاب کے پیش نظر ملک بھر میں ہنگامی الرٹ جاری کر دیا ہے۔

وزارت کے مطابق بھارتی ہائی کمیشن نے سفارتی چینل کے ذریعے پاکستان کو مطلع کیا، تاہم بھارت نے باضابطہ اطلاع کے لیے انڈس واٹر کمشنر کا چینل استعمال نہیں کیا، جو غیر معمولی رویے کی نشاندہی کرتا ہے۔

حکام کا کہنا ہے کہ ستلج میں پانی کی سطح خطرناک حد تک بلند ہو سکتی ہے، جس سے ہریکے اور فیروزپور کے علاقوں میں شدید سیلاب کا خطرہ ہے۔ اس تناظر میں 28 اہم محکموں کو الرٹ جاری کر دیا گیا ہے۔

پنجاب میں دریاؤں میں طغیانی، 11 اضلاع متاثر، 31 افراد جاں بحق

پنجاب بھر میں دریاؤں میں طغیانی کی صورتحال برقرار ہے۔ اب تک 11 اضلاع کے ڈھائی ہزار سے زائد دیہات زیرِ آب آ چکے ہیں، جبکہ سیلاب سے جاں بحق افراد کی تعداد 31 ہو گئی ہے۔ متاثرہ افراد کی مجموعی تعداد 30 لاکھ تک پہنچ گئی ہے۔

پنجاب ڈیزاسٹر مینجمنٹ اتھارٹی (PDMA) کے مطابق دریائے چناب میں بڑا سیلابی ریلا جنوبی پنجاب کی جانب بڑھ رہا ہے۔ مختلف مقامات پر پانی کی صورتحال درج ذیل ہے:

مرالہ: 96,000 کیوسک

خانکی: 1,20,000 کیوسک

قادرآباد: 1,35,000 کیوسک

ہیڈ تریموں: 5,16,000 کیوسک (انتہائی اونچے درجے کا سیلاب)

دریائے راوی میں بھی پانی کی سطح میں تیزی سے اضافہ ہو رہا ہے، جس سے متعلقہ علاقوں میں الرٹ جاری کر دیا گیا ہے۔

واپڈا کی رپورٹ: آبی ذخائر بھرنے لگے

واپڈا کی تازہ رپورٹ کے مطابق تربیلا، منگلا اور چشمہ ڈیمز میں پانی کا مجموعی ذخیرہ 1 کروڑ 20 لاکھ 53 ہزار ایکڑ فٹ تک پہنچ چکا ہے۔ پانی کی آمد کی تفصیلات درج ذیل ہیں:

تربیلا: 1,99,500 کیوسک

منگلا: 35,900 کیوسک

چشمہ: 2,37,700 کیوسک

یہ صورتحال نہ صرف پنجاب بلکہ ملک کے دیگر علاقوں کے لیے بھی سیلابی خطرے کی گھنٹی ہے۔ حکومت اور ضلعی انتظامیہ نے ہنگامی اقدامات شروع کر دیے ہیں، جب کہ شہریوں کو احتیاطی تدابیر اپنانے کی ہدایت کی گئی ہے۔