وزیراعظم شہباز شریف کا چین کا اہم دورہ: ایس سی او اجلاس میں شرکت، اعلیٰ چینی قیادت سے ملاقاتیں اور سرمایہ کاری پر توجہ

اسلام آباد: وزیراعظم پاکستان محمد شہباز شریف 30 اگست سے 4 ستمبر 2025 تک چین کا سرکاری دورہ کریں گے۔ یہ دورہ چینی صدر شی جن پنگ کی خصوصی دعوت پر ہو رہا ہے، جس کا مقصد پاک-چین دوستی کو مزید مستحکم کرنا اور باہمی اقتصادی و اسٹریٹجک تعاون کو نئی جہتوں سے ہمکنار کرنا ہے۔

دفتر خارجہ کی جانب سے جاری کردہ بیان کے مطابق وزیراعظم تیانجن میں منعقد ہونے والے شنگھائی تعاون تنظیم (SCO) کے سربراہانِ مملکت کے اجلاس میں پاکستان کی نمائندگی کریں گے، جہاں وہ علاقائی امن، ترقی اور تعاون جیسے اہم امور پر عالمی رہنماؤں سے تبادلہ خیال کریں گے۔

بیجنگ میں وزیراعظم شہباز شریف کی چینی صدر شی جن پنگ اور ہم منصب لی چیانگ سے اہم ملاقاتیں بھی شیڈول ہیں، جن میں دوطرفہ تعلقات، سی پیک فیز ٹو، سرمایہ کاری، تجارتی تعاون، توانائی، انفراسٹرکچر اور دیگر کلیدی شعبوں پر تفصیلی گفتگو متوقع ہے۔

وزیراعظم بیجنگ میں اس تاریخی فوجی پریڈ میں بھی شرکت کریں گے جو دوسری عالمی جنگ میں فاشزم کے خلاف فتح کی 80 ویں سالگرہ کی مناسبت سے منعقد ہو رہی ہے۔ یہ تقریب بین الاقوامی یکجہتی اور امن کے فروغ کی علامت سمجھی جا رہی ہے۔

اپنے دورے کے دوران وزیراعظم پاکستان نمایاں چینی صنعتکاروں اور سرمایہ کاروں سے بھی ملاقاتیں کریں گے، جبکہ وہ پاک-چین بزنس ٹو بزنس انویسٹمنٹ کانفرنس سے خطاب کرتے ہوئے پاکستان میں سرمایہ کاری کے مواقع کو اجاگر کریں گے۔ ان ملاقاتوں کا مقصد پاکستان میں معاشی ترقی کے نئے در وا کرنا اور تجارتی روابط کو وسعت دینا ہے۔

دفتر خارجہ کا کہنا ہے کہ یہ دورہ پاکستان اور چین کے درمیان "ہر موسم کی اسٹریٹجک شراکت داری” کو مزید گہرا کرنے کی عملی عکاسی ہے۔ دونوں ممالک کے مابین قریبی قیادت کا رابطہ اس بات کا ثبوت ہے کہ بیجنگ اور اسلام آباد نہ صرف ایک دوسرے کے بنیادی مفادات کی حمایت کرتے ہیں بلکہ علاقائی و عالمی سطح پر باہمی مشاورت اور تعاون کو بھی انتہائی اہمیت دیتے ہیں۔