9 مئی کیس میں حقائق کی فتح، جھوٹے بیانیے کی قلعی کھل گئی: پی ٹی آئی رہنماؤں کا عدالتی فیصلے پر ردعمل

اسلام آباد (بیورو رپورٹ) – پاکستان تحریک انصاف (پی ٹی آئی) کے سینئر رہنماؤں نے سپریم کورٹ کی جانب سے 9 مئی کے مقدمات میں چیئرمین عمران خان کی ضمانت کی منظوری کو تاریخی فیصلہ قرار دیتے ہوئے کہا ہے کہ اس فیصلے نے نو مئی کے حوالے سے بنائے گئے جھوٹے بیانیے کی قلعی کھول دی ہے اور عوام کے سامنے حقائق بے نقاب ہو گئے ہیں۔

"عدالتوں نے سچ کا ساتھ دیا” — سلمان اکرم راجہ

خیبرپختونخوا ہاؤس اسلام آباد میں پریس کانفرنس سے خطاب کرتے ہوئے معروف وکیل اور پارٹی رہنما سلمان اکرم راجہ نے کہا کہ آج کا فیصلہ اس بات کا ثبوت ہے کہ پی ٹی آئی اپنے مؤقف پر ڈٹی ہوئی ہے اور ملک کی اعلیٰ عدالتیں انصاف پر مبنی فیصلے دے رہی ہیں۔

انہوں نے کہا،

"عوام اب جان چکے ہیں کہ 9 مئی کا کیس ایک سیاسی انتقام پر مبنی جھوٹ تھا۔ معافی وہی مانگیں جو عوامی مینڈیٹ چوری کرنے میں شریک رہے۔”

انہوں نے یقین دہانی کروائی کہ اگر کسی فیصلے میں پارٹی کے خلاف کچھ آیا، تو قانونی راستہ اپنایا جائے گا اور آئینی حدود میں رہتے ہوئے مکمل قانونی دفاع کیا جائے گا۔

"انصاف کی ٹھنڈی ہوا محسوس ہوئی” — لطیف کھوسہ

سینئر رہنما اور قانون دان لطیف کھوسہ نے کہا کہ سپریم کورٹ کا فیصلہ آئین کی بالادستی کی جیت ہے۔

"بہت دنوں کے بعد آج انصاف کی ٹھنڈی ہوا محسوس ہوئی۔ عدالت نے ثابت کیا کہ صرف الزامات سے نہیں، بلکہ ثبوت اور قانون کے مطابق فیصلے ہوتے ہیں۔”

انہوں نے کہا کہ عمران خان کی گرفتاری غیر قانونی تھی اور اس فیصلے کے بعد مستقبل میں ایسے سیاسی مقدمات کا راستہ بند ہو جانا چاہیے۔ انہوں نے قید کارکنان کی رہائی کا مطالبہ بھی دہرایا۔

"یہ جھوٹے بیانیے کی دفن ہونے کی علامت ہے” — عامر ڈوگر

پارٹی رہنما عامر ڈوگر نے فیصلے کو "حقائق کی فتح” قرار دیا۔

"آج کا فیصلہ واضح کر رہا ہے کہ سچ کبھی چھپ نہیں سکتا۔ 9 مئی کے حوالے سے جو بیانیہ گھڑا گیا، وہ آج عدالتی کٹہرے میں بے نقاب ہو چکا ہے۔”

انہوں نے کہا کہ پی ٹی آئی متحد ہے اور آئندہ بھی آئینی دائرہ کار میں اپنی سیاسی جدوجہد جاری رکھے گی۔