گلگت بلتستان: پاکستان فضائیہ نے گلگت بلتستان میں حالیہ سیلاب سے متاثرہ علاقوں میں بڑے پیمانے پر ریلیف آپریشن کا آغاز کر دیا ہے۔ متاثرہ علاقوں میں بروقت امدادی کارروائیاں کرتے ہوئے پاک فضائیہ نے 75 افراد کو محفوظ مقامات پر منتقل کر کے قیمتی جانیں بچا لیں۔
آئی ایس پی آر کے مطابق، سی 130 طیاروں کے ذریعے پی اے ایف بیس نور خان سے 7 ٹن خشک راشن، روزمرہ ضروری اشیاء اور جان بچانے والی ادویات گلگت پہنچائی گئیں۔ یہ امدادی سامان نیشنل ڈیزاسٹر مینجمنٹ اتھارٹی (NDMA) کے تعاون سے دور دراز اور زمینی رابطے سے محروم علاقوں میں تقسیم کیا جا رہا ہے۔
اگرچہ بارشوں اور لینڈ سلائیڈنگ کے باعث زمینی راستے منقطع ہو چکے ہیں، تاہم پاک فضائیہ نے اپنی پیشہ ورانہ مہارت، عزم اور فرض شناسی کا مظاہرہ کرتے ہوئے متاثرہ خاندانوں تک تمام ضروری سامان پہنچانے کو یقینی بنایا۔
ریلیف آپریشن جاری رہے گا
آئی ایس پی آر کے مطابق، امدادی سرگرمیاں مربوط انداز میں اور بھرپور رفتار کے ساتھ جاری رکھی جائیں گی۔ متاثرین تک خوراک، ادویات، شیلٹرز اور طبی امداد کی بلاتعطل فراہمی کو یقینی بنایا جا رہا ہے۔
"امید کی کرن” بن گئی پاک فضائیہ
پاک فضائیہ کی بروقت اور موثر کارروائی متاثرہ خاندانوں کے لیے نہ صرف فوری ریلیف کا ذریعہ بنی بلکہ ایک "امید کی کرن” بھی ثابت ہوئی۔ متاثرہ علاقوں کے عوام نے پاک فضائیہ کی خدمات کو خراج تحسین پیش کرتے ہوئے کہا ہے کہ مشکل کی اس گھڑی میں ریاستی اداروں کی موجودگی ان کے لیے حوصلے اور اعتماد کا باعث بنی۔
