گورنر سندھ کا خیبرپختونخوا کے سیلاب متاثرین سے اظہارِ ہمدردی، جلد متاثرہ علاقوں کے دورے کا اعلان

سکھر (نمائندہ خصوصی): گورنر سندھ کامران ٹیسوری نے خیبرپختونخوا میں حالیہ سیلابی تباہی پر گہرے دکھ اور افسوس کا اظہار کرتے ہوئے اعلان کیا ہے کہ وہ جلد متاثرہ علاقوں کا دورہ کریں گے تاکہ خیبرپختونخوا کی حکومت اور متاثرہ عوام سے یکجہتی کا اظہار کیا جا سکے۔

سکھر میں میڈیا سے گفتگو کرتے ہوئے گورنر سندھ نے کہا کہ:

"مشکل کی اس گھڑی میں ہم خیبرپختونخوا کے بھائیوں کے ساتھ کھڑے ہیں۔ سیلاب سے قیمتی جانوں کے ضیاع اور بنیادی ڈھانچے کی تباہی پر دل گرفتہ ہوں۔”

کامران ٹیسوری نے کہا کہ قدرتی آفات جیسے سیلاب کے موقع پر وفاق سمیت تمام صوبوں کو سیاست سے بالاتر ہو کر متحد ہونا چاہیے، تاکہ متاثرین کو فوری اور مؤثر امداد فراہم کی جا سکے۔

انہوں نے اس عزم کا اظہار کیا کہ وہ خود خیبرپختونخوا جا کر صورتحال کا جائزہ لیں گے اور جہاں ضرورت ہو، ہر ممکن تعاون فراہم کریں گے۔

بین الصوبائی یکجہتی کی عمدہ مثال
سیاسی و سماجی تجزیہ کاروں کا کہنا ہے کہ گورنر سندھ کا یہ اعلان نہ صرف قومی یکجہتی کی علامت ہے بلکہ بین الصوبائی ہم آہنگی کو فروغ دینے کی بھی ایک مؤثر کوشش ہے۔ ایسے اقدامات سے نہ صرف متاثرہ عوام کا حوصلہ بڑھتا ہے بلکہ صوبوں کے درمیان اعتماد اور تعاون بھی مضبوط ہوتا ہے۔

خیال رہے کہ خیبرپختونخوا میں حالیہ شدید بارشوں، بادل پھٹنے اور سیلابی ریلوں کے نتیجے میں 300 سے زائد افراد جاں بحق ہو چکے ہیں، جبکہ ہزاروں لوگ بے گھر اور بنیادی سہولیات سے محروم ہو چکے ہیں۔