بیرسٹر گوہر ایاز کا بڑا اعلان: بانی پی ٹی آئی نے گنڈاپور کو مستعفی ہونے کا نہیں کہا، پارٹی معاملات میں وضاحت

اسلام آباد: پاکستان تحریک انصاف (پی ٹی آئی) کے چیئرمین بیرسٹر گوہر ایاز نے واضح کیا ہے کہ بانی پی ٹی آئی عمران خان نے علی امین گنڈاپور کو مستعفی ہونے کا کوئی حکم نہیں دیا بلکہ صوبے میں امن و امان کی خراب صورتحال پر تشویش کا اظہار کیا تھا۔

بیرسٹر گوہر نے مزید کہا کہ عرفان سلیم اور عائشہ بانو سمیت کسی بھی رکن کو پارٹی کی طرف سے شوکاز نوٹس جاری نہیں کیا گیا اور انہیں پارٹی کے اندر کہیں اور جگہ دی جائے گی تاکہ وہ بہتر انداز میں اپنا کردار ادا کر سکیں۔

بنی گالہ نیلامی کی خبروں پر وضاحت
بیرسٹر گوہر نے کہا کہ بنی گالہ کی نیلامی سے متعلق خبروں کے بارے میں انہوں نے اپنے قانونی گروپ میں معلومات شیئر کی تھیں، جس پر نیب نے واضح کیا کہ یہ پراپرٹی عمران خان کی ملکیت نہیں ہے اور اس سلسلے میں ان کے خلاف کوئی قانونی کارروائی جاری نہیں ہے۔

بانی پی ٹی آئی اور ان کے بیٹوں کے حوالے سے حقائق
انہوں نے بتایا کہ بانی پی ٹی آئی کا کہنا ہے کہ تحریک چلانے کے لیے وہ خود کافی ہیں اور ان کے بیٹوں کی پاکستان آمد کی ضرورت نہیں۔ البتہ اگر وہ آنا چاہیں تو انہیں خوش آمدید کہا جائے گا۔ پارٹی کا بانی کے بیٹوں سے کوئی براہِ راست تعلق نہیں بلکہ صرف فیملی ممبران رابطے میں ہیں، جبکہ پارٹی کی طرف سے ان سے کوئی رابطہ نہیں کیا گیا۔

صوبے میں امن و امان اور گرینڈ الائنس کی صورتحال
بیرسٹر گوہر نے بتایا کہ بانی پی ٹی آئی کا مؤقف تھا کہ صوبے میں کسی قسم کا آپریشن نہ کیا جائے کیونکہ موجودہ صوبائی حکومت اس کے حق میں نہیں ہے۔ انہوں نے مزید کہا کہ گرینڈ الائنس اب بھی چھ پارٹیوں پر مشتمل ہے لیکن بانی پی ٹی آئی نے اس میں شمولیت سے انکار کیا ہے۔

احتجاج اور لانگ مارچ پر موقف
بیرسٹر گوہر نے کہا کہ ملک بھر میں احتجاجی مظاہرے ہوئے لیکن بانی پی ٹی آئی نے لانگ مارچ میں شرکت سے منع کیا تھا۔ انہوں نے یہ بھی بتایا کہ گرینڈ الائنس میں مولانا فضل الرحمٰن اور جماعت اسلامی کو شامل کرنے کی کوشش کی گئی تھی۔