لاہور (اسپورٹس ڈیسک)
پاکستان کرکٹ ٹیم کے سابق کپتان اور لیجنڈری آل راؤنڈر وسیم اکرم نے ایشیا کپ 2025 کے لیے تجربہ کار بلے باز بابر اعظم کی قومی ٹی ٹوئنٹی اسکواڈ میں واپسی کا مطالبہ کر دیا ہے۔
خصوصی گفتگو میں وسیم اکرم کا کہنا تھا کہ اگر ان کے پاس اختیار ہوتا تو وہ بابر اعظم کو فوراً ٹیم میں شامل کرتے، کیونکہ ایسے بڑے ایونٹس میں سینیئر بیٹرز کا ہونا لازمی ہوتا ہے۔
"بابر کو نمبر 3 پر کھلایا جائے”
وسیم اکرم کے مطابق بابر اعظم کی آئیڈیل بیٹنگ پوزیشن نمبر 3 ہے، کیونکہ وہ نہ صرف رنز کی رفتار بڑھا سکتے ہیں بلکہ میچ کی صورتحال کے مطابق بیٹنگ میں تبدیلی بھی لا سکتے ہیں۔
انہوں نے کہا:
"بابر نے 2019 میں سمرسیٹ کاؤنٹی کے لیے کھیلتے ہوئے تقریباً 150 کے اسٹرائیک ریٹ سے رنز بنائے، وہ ٹی ٹوئنٹی کے تقاضوں کو سمجھتے ہیں۔”
"بابر کو فارم سے نہیں، فیصلوں سے نکالا گیا”
خیال رہے کہ بابر اعظم نے قومی ٹی ٹوئنٹی ٹیم کی جانب سے آخری مرتبہ دسمبر 2024 میں جنوبی افریقا کے خلاف میچ کھیلا تھا۔ بعد ازاں ان کے کم اسٹرائیک ریٹ کو بنیاد بناتے ہوئے انہیں اسکواڈ سے باہر کر دیا گیا۔ اب جبکہ فخر زمان انجری کا شکار ہیں، بابر کی واپسی کی بازگشت زور پکڑ رہی ہے۔
"بابر اب بھی دنیا کے بہترین کھلاڑیوں میں شامل ہیں”
سابق کپتان نے مزید کہا کہ بابر اعظم نہ صرف ذمہ دارانہ بیٹنگ کرتے ہیں بلکہ نوجوان کھلاڑیوں کو ساتھ لے کر چلنے کی صلاحیت بھی رکھتے ہیں۔
"بابر اب بھی دنیا کے بہترین بلے بازوں میں شامل ہیں، وہ فارمیٹ اور میچ کی صورتحال کے مطابق خود کو ڈھال سکتے ہیں، اور ان کے پاس ابھی کافی کرکٹ باقی ہے۔”
"کوچ کی مرضی، مگر سپورٹ سب کو کرنا چاہیے”
ایک سوال کے جواب میں وسیم اکرم کا کہنا تھا کہ بابر اعظم کو ٹیم میں شامل کرنا چاہیے، لیکن انہیں جہاں کوچ چاہے کھلائے، کیونکہ یہ فیصلہ ٹیم کمبی نیشن اور میچ کی صورتحال کے مطابق ہونا چاہیے۔ تاہم ان کے نزدیک نمبر تین بابر کے لیے بہترین پوزیشن ہے۔
