سلام آباد:
پاکستان تحریک انصاف (پی ٹی آئی) کے مرکزی رہنما اور سابق وفاقی وزیر حماد اظہر نے 9 مئی کے مقدمات میں پولیس کو گرفتاری دینے سے انکار کرتے ہوئے قانونی راستہ اپنانے کا فیصلہ کیا ہے۔ ذرائع کے مطابق، وہ جلد پشاور ہائیکورٹ سے حفاظتی ضمانت حاصل کرنے کے لیے عدالت میں پیش ہوں گے۔
قانونی حکمت عملی تیار
حماد اظہر کی قانونی ٹیم نے تمام مقدمات کا ریکارڈ اکٹھا کر لیا ہے، اور حفاظتی ضمانت کی درخواست دائر کرنے کی تیاریاں مکمل کر لی گئی ہیں۔ ذرائع کا کہنا ہے کہ حماد اظہر نے قانونی مشاورت کے بعد طے کیا کہ وہ براہ راست گرفتاری کے بجائے آئینی و قانونی حقوق کا استعمال کریں گے تاکہ مناسب عدالتی کارروائی کا سامنا کیا جا سکے۔
متعدد مقدمات، قانونی چیلنج
حماد اظہر کے خلاف لاہور، فیصل آباد، اسلام آباد اور دیگر شہروں میں 50 سے زائد مقدمات درج ہیں، جن میں وہ مختلف بار اشتعاری قرار دیے جا چکے ہیں۔ ان پر الزام ہے کہ وہ 9 مئی 2023 کے بعد ہونے والے پرتشدد واقعات میں مبینہ طور پر ملوث رہے، تاہم ان کی جانب سے تمام الزامات کی تردید کی گئی ہے۔
روپوشی کے بعد واپسی کا عندیہ
حماد اظہر تقریباً دو سال سے روپوش تھے۔ تاہم حالیہ دنوں میں والد کے انتقال کے بعد انہوں نے منظرِ عام پر آنے کا اشارہ دیا تھا۔ ان کا کہنا ہے کہ وہ اب عدالتوں کا سامنا قانونی طریقے سے کریں گے اور اپنے خلاف الزامات کو چیلنج کریں گے۔
